अर्घाखाँची मालारानी गाउँपालिका–८ मा रहेको बालशिक्षा माविका प्रधानाध्यापक राजेन्द्रप्रसाद पन्थीलाई विद्यालय जाने क्रममा बिचबाटो मै रोकि कालोमोसो दल्ने, हातपात र अभद्र दुर्व्यवहार गरिएको छ । क्रान्तिकारी कम्युनिष्ट पार्टीका (मोहन वैद्य) जिल्ला संयोजक हुकुम खड्का र सहसंयोजक नगेश्वर पाण्डेले उनिमाथी दुर्व्यवहार गरे । र उक्त भिडियो सामाजिक संजालमा समेत राखे । प्राध्यापकले जाँड रक्सी खाएर विद्यालय जाने र बालबालिका लाई दुर्व्यवहार गरेको, दिवा खाजाको रकम हिनामिना गरेको अनावश्यक रूपमा शिक्षक नियुक्ति गरी घुस खाएको, एकजना महिलालाई विगतमा हातपात गरेको र आन्तरिक रूपमा रकम दिएर जनप्रतिनिधिको रोबरमा गुपचुप गरि मिलाएको, विद्यार्थीबाट अनावश्यक शुल्क असुल गरेकोले जनकारबाही गरिएको क्रान्तिकारी कम्युनिष्ट पार्टिले जनाएको छ भने ब्याक्तिगत रिसिविका कारण दुर्व्यवहार गरेको प्रहरिको प्रारम्भिक अनुसन्धान छ ।
यसो त दुर्व्यवहार गर्ने २ जनालाई प्रहरीले पक्राउ गरिसकेको छ । गलत गर्नेलाई कानुन बमोजिम कारबाही हुनु पर्छ यसमा दुई मत छैन तर यस्ता संगठनहरुले जनकारबाहीको नाममा गरिने दुर्व्यवहार अराजता नै हुन् । यसो त यस्ता घटना देशमा धेरै हुने गरेका छन् तर संयन्त्र भने निरीह बनिरहेको छ । यस्ता अराजक गतिविधिहरुलाई नियन्त्रण गर्नपर्छ । विधिको शासन भएको देशमा सबै कुरा कानुन र पद्धतिबाटै हुनुपर्छ । गलत गर्नेले कानुनको दायरामा रहेर कारबाही पाउनु पर्छ र पाउछ तर आफ्नो ब्यक्तिगत स्वार्थ पुर्तिका लागि राजनैतिक रंग दिएर कालोमोसो दलिनु आफैमा अपराध हो । यो कार्य समाजमा अपाच्य र कानूनको बर्खिलाप हो । कानून हातमा लिई जुन कार्य गरिएको छ, यो कार्य समाज सुहाउँदो कार्य होइन ।आबेगमा आएर गरिमे यस्ता हर्कतले एकैछिनको रीस शान्त होला तर यसको दुरगामी असर नराम्रो हुन्छ ।
पछिल्लो समय स्वतन्त्रताका नाममा, आन्दोलन र अभियानका नाममा जे जस्ता अराजक कदम चालेपनी हुन्छ भन्ने नजिर स्थापित हुँदै गइरहेको छ । विधिको शासन भएको देशमा यी र यस्ता गतिविधि अपराधिक कदम हुन् । चाहे त्यो शिक्षकले गरेको भनिएको गलत प्रबृत्ति होस् चाहे कालोमोसो दल्ने प्रवृत्ति यी दुबै खराब हुन् । यसलाई आन्दोलन, अभियान र स्वभाविक आक्रोशको हिसाबले होइन, कानुन र अपराधका हिसाबले नै हेरिनु पर्छ । नत्र देशमा यस्ता अराजक पात्र र प्रवृत्तिले प्रश्रय पाउदै जाने मात्रै होइन, यसकै आडमा देशमा अशान्ति र अस्थिरता सिर्जना हुन सक्ने खतरा छ । यसमा सरकार र सम्बन्धित सरोकारवाला निकायले समयमै सचेतता अपनाउनु आवश्यक छ ।
