बुटवल । प्रधानमन्त्री केपी शर्मा ओलीले सरकार विद्यालय शिक्षा ऐन चाँडै ल्याउने तयारीमा रहेको बताएका छन्।
नेकपा (एमाले) रूपन्देही जिल्ला कमिटीले शुक्रबार बुटवलमा आयोजना गरेको जागरणसभालाई सम्बोधन गर्दै प्रधानमन्त्री ओलीले आन्दोलनरत शिक्षकहरूलाई आन्दोलन स्थगित गर्न आग्रह गरेका हुन्। “समस्याहरू छन्, तर सडकमा गइरहनुपर्ने थिएन,” प्रधानमन्त्री ओलीले भने, “म शिक्षकहरूलाई भन्न चाहन्छु—शिक्षा ऐन चाँडै आउँछ। तपाईंहरूले आफ्ना समस्या मात्रै होइन, राष्ट्रको हित र आर्थिक अवस्था पनि विचार गर्नुपर्छ।”
प्रधानमन्त्री ओलीले वर्तमान सरकार सबै क्षेत्र र समुदायको आवाज सुन्ने सरकार भएको दाबी गर्दै कुनै पनि समस्या समाधानका लागि संवाद र सहकार्य आवश्यक रहेको उल्लेख गरे।
त्यसैगरी, त्रिभुवन विश्वविद्यालयका उपकुलपतिसँग सम्बन्धित विषयमा बोल्दै उनले उपकुलपतिले अन्य माध्यमबाट पठाएको राजीनामा आफूले यकिन गरेर स्वीकृत गरेको स्पष्ट पारे। “उपकुलपतिसँग भिडन्त भयो भन्ने प्रचारमा कुनै सत्यता छैन,” उनले भने।
प्रधानमन्त्री ओलीको भनाइसँगै शिक्षा क्षेत्रमा देखिएको तनाव समाधानतर्फ अघि बढ्ने आशा गरिएको छ।
