काठमाडौँ । नेपाली काँग्रेसका नेता प्रकाशमान सिंहले पार्टी विधि र नियममा नचलेको बताएका छन्।
शनिवार नेपाली काँग्रेस जिल्ला कार्य समिति ललितपुरको प्रथम जिल्ला सम्मेलन कार्यक्रमलाई सम्बोधन गर्दै उनले यस्तो बताएका हुन्। उनले नियम र विधिबाट पार्टी सञ्चालन हुनुपर्ने भन्दै विधिसम्मत रूपमा पार्टी नचल्दा असन्तोष व्यक्त भइरहेको बताए।
उनले अबको समयमा पार्टीलाई विधिसम्मत रूपमा अघि बढाउने हो भने काँग्रेसले कुनै पनि पार्टीको चुनौती सहनु नपर्ने बताए। उनले काँग्रेसको जस्तो राम्रो विचारधारा भएको अन्य कुनै पार्टी नरहेको जिकिर गरे।
उनले भने, ‘मेरो एउटै जोड छ, विधि र नियमबाट पार्टी चलाऔँ। अब बचेको समयमा पार्टीलाई विधि, नियमसम्मत अघि बढायौँ भने अरू पार्टीको चुनौती सामना गर्नु पर्नेछैन। लामो इतिहास भएको पार्टी हो। काँग्रेस पार्टीको जस्तो विचारधारा अरू कुन पार्टीको छ र ? आफूले गर्नुपर्ने काम सबैले गरौँ।’
नेता सिंहले जननिर्वाचित प्रतिनिधि र संगठनका नेताहरूबीच समन्वय हुन आवश्यक देखिएको बताए।
