बुटवल । प्रधानमन्त्री पुष्पकमल दहाल प्रचण्डले लोकतन्त्रको सर्भिसिङ र शुद्धिकरण सूरु भएको बताएका छन् ।
बुधबार प्रतिनिधिसभा बैठकमा प्रधानमन्त्री तथा मन्त्रीपरिषद कार्यालय, उपराष्ट्रपति कार्यालय र राष्ट्रिय योजना आयोगको सचिवालयको विनियोजन शिर्षकमाथि सांसदहरुले उठाएका प्रश्नको जवाफ दिने क्रममा प्रधानमन्त्री प्रचण्डले लोकतन्त्रको सर्भिसिङ र शुद्धिकरण पनि सूरु भएको र यो अभियान यतिमा नरोकिने, निरन्तर अगाडि बढ्ने बताएका छन् ।
लोकतन्त्र भित्र देखापर्ने समस्याको समाधान पनि लोकतन्त्रबाट नै प्राप्त हुन्छ भन्ने ऐतिहासिक मापदण्ड राम्रोसँग स्थापित भएको भन्दै प्रधानमन्त्री प्रचण्डले नक्कली भुटानी शरणार्थी प्रकरणमा सरकारले गरेको इतिहासकै ठूलो अनुसन्धान र कारबाही पछि जनतामा विश्वास जाग्न सुरु भएको बताए ।
“मैले नेतृत्व लिँदै गर्दा जनतामा राज्यप्रति र सरकारप्रति जुन निराशा, असन्तोष र आवेग थियो । अहिले त्यसमा सुधार भएको छ ।” उनले भने “ यसलाई मैले यसबीचको सबैभन्दा ठूलो उपलब्धिको रुपमा मानेको छु ।”
प्रधानमन्त्री दाहालले मुलुकमा सुशासनका लागि लडाई नै सुरु गरेको उल्लेख गर्दै त्यसमा सदन र आम नेपाली जनताले सरकारलाई अझ ठूलो हौसला र सहयोग दिने विश्वास पनि म व्यक्त गरे ।
