बुटवल । राष्ट्रिय सभा निर्वाचनका लागि लुम्बिनी प्रदेशमा २ सिटका लागि ७ जनाको उम्मेद्वारी दर्ता भएको छ ।
निर्वाचन आयोगका अनुसार लुम्बिनी प्रदेशबाट ३ जना महिला र अन्यमा ४ जनासहित ७ जनाको उम्मेदवारी परेको हो । महिलामा एमालेकी तुलसा कुमारी, नेपाली कांग्रेसका विष्णुकुमारी सापकोटा र राप्रपाकी विजयलक्ष्मी सिंहले उम्मेदवारी दर्ता गराएका छन् । केसी दाङ, सापकोटा गुल्मी र सिंह कपिलवस्तु जिल्लाका हुन् ।
अर्को एक सिटका लागि जनमत पार्टीका बालगोविन्द चौधरी, एमालेका झपेन्द्र बहादुर जिसी, राप्रपाका निरञ्जन थापा र माओवादीका झक्कुप्रसाद सुवेदीको उम्मेदवारी दर्ता भएको छ । उम्मेदवारी दर्ता गराउने जनमतका चौधरी नवलपरासीका हुन् भने जिसी पाल्पा, थापा रूपन्देही र सुवेदी रोल्पाका हुन् ।
माघ ११ गते हुने राष्ट्रिय सभा सदस्य निर्वाचनका लागि सात वटै प्रदेशबाट १९ वटा सिटको लागि ५२ जना उम्मेदवारको मनोनयनपत्र दर्ता भएको हो।
