अर्घाखाँची । अर्घाखाँचीमा जारी एपिएल क्रिकेटमा सौजन्य समाज किमडाँडा फाइनल प्रवेश गरेको छ । सुपर सुपा ईलाभेनलाई ९ विकेटले पराजित गर्दै किमडाँडा फाइनल प्रवेश गरेको हो ।
बलरहरुको घातक बलिङ र कसिलो फिल्डिङ्गको सहायतामा किमडाँडाले सुपर सुपालाई ४३ रनमै रोक्न सफल भयो । किमडाँडाका सरोज खत्रीले उत्कृष्ट बलिङ गर्दै ३ विकेट लिए । यस्तै शुभम खनालले ३ ओभर गर्दै महत्वपूर्ण ३ विकेट हात पारे भने बाबुराम थापाले २ र निखिल केसीले १ विकेट लिएका थिए । सुपर सुपाका शुसिल भुसालले बाहेक अन्य खेलाडीले दोहोरो अङ्क बनाउन सकेनन् ।
४४ रनको सामान्य लक्ष्य पाएको किमडाँडाले ६ दशमलव २ ओभरमा १ विकेटको क्षतिमा जित हासिल गर्यो । विशेष भाटको २३ र सरोज खत्रीको २० रनको मद्दतमा किमडाँडा फाइनल प्रवेश गरेको हो ।
यसअघि भएको पहिलो खेलमा अपराजित यात्रा कायम राखेकाे रोयल सन्धिखर्कले ईलाभेन ब्रदर्श डिभर्नालाई ७ विकेटले पराजित गर्यो । भोलि शनिवार रोयल सन्धिखर्क र सौजन्य समाज किमडाँडा उपाधिका लागि भिड्ने छन् । बिहान ११ बजे टुँडिखेल मैदानमा यी दुई टोलीबीच फाइनल खेल हुनेछ ।
एपिएलका सम्पूर्ण खेलहरु एवान टेलिभिजन र ट्रेन्डिङ्गखवरबाट प्रत्यक्ष प्रसारण हुँदै आईरहेका छन् भने क्रिकहिरोज डटकमबाट बल बाई बलको लाइभ अपडेट गरिएको छ ।
