रुपन्देही । नेकपा एमालेको प्रथम लुम्बिनी प्रदेश अधिवेशनमा नयाँ नेतृत्वका लागि अध्यक्ष पदमा राधाकृष्ण कँडेल र हरि रिजालले उम्मेदवारी दर्ता गराएका छन् । कंडेल वर्तमान अध्यक्ष हुन् भने रिजाल केन्द्रीय सदस्य हुन्।
सहमतीमा नेतृत्व टुंगाउने प्रयास गरेपनि अन्तत दुई समूहबाट अध्यक्षमा उमेदवारी परेको हो। पाल्पाका कँडेल उपाध्यक्ष विष्णु पौडेल समूहका हुन् भने रिजाल महासचिव शंकर पोखरेल समूहका मानिन्छन् । प्युठानका रिजाल केन्द्रीय सदस्य समेत रहेका छन्।
अध्यक्षमा उम्मेदवारी दर्ता गराएका रिजालको उम्मेदवारीमा विजयविराज विष्ट प्रस्तावक र बालसिंह काउछा समर्थक रहेका छन्। कँडेलको उम्मेदवारीमा राजुप्रसाद श्रेष्ठ प्रस्तावक र भोजराज पोखरेल समर्थक रहेका छन्।
बुटवलको अन्तर्राष्ट्रिय सम्मेलन केन्द्रमा जारी अधिवेशनका लागि १२ वटै जिल्लाबाट छानिएका १ हजार ४ प्रतिनिधिहरु सहभागी छन्। एमाले अधिवेशनको निर्वाचनका सबै प्रक्रिया आज बिहान १० बजेसम्मका लागि स्थगित भएका छन्। अध्यक्ष, उपाध्यक्ष सहितका पदाधिकारीमा दुई दुई जनाको उमेदवारी परेपछि अध्यक्ष मण्डलले निर्वाचन प्रक्रिया स्थगित गर्न निर्देशन दिएको थियो।
मुख्य निर्वाचन अधिकृत हरिप्रसाद भण्डारीले सोमबार बिहान १० बजेसम्मकालागि उमेदवारी दर्ता प्रक्रिया स्थगित भएको जानकारी दिए।
