बागलुङ । पाण्डवखानी माध्यमिक विद्यालय गलकोट नगरपालिका – १० पाण्डवखानी बागलुङले आफ्नो ६० औँ वर्ष पुरा गरेको अवसरमा मनाउन लागेको हीरक जयन्ती महोत्सवको तैयारी तीब्र पारेको छ ।
विद्यालयले यही मंसिर २९ गतेदेखि पौष ३ गतेसम्म विविध कार्यक्रम सहित हीरक जयन्ती महोत्सव मनाउँदै छ । विद्यालयको शैक्षिक गुणस्तर सुधार गर्ने र प्राविधिक शिक्षा सहित उच्च शिक्षाको जग बसाल्ने उद्देश्यले महोत्सव आयोजना गर्न लागिएको विद्यालयका प्रधानाध्यापक नर बहादुर सुनार नविनले जानकारी दिए ।
महोत्सवलाई भव्य र सभ्य रुपमा सम्पन्न गर्न तयारीका कामहरू धमाधम अगाडि बढिरहेको उनको भनाई छ । पूर्व विद्यार्थीहरू बिच सम्पर्क गर्ने, प्रचारप्रसार सहित अन्य आन्तरिक तयारीका कामहरू तीब्र रुपमा अगाडि बढेको उनको भनाई छ ।
महोत्सवको लक्ष्यलाई पूरा गर्न पूर्व विद्यार्थीहरू र समस्त दाता महानुभावहरूलाई सक्दो आर्थिक दान गर्न आह्वान गर्ने निर्णय गरिएको विद्यालयका संरक्षक निरज पुनले जानकारी दिए ।
मंसिर २९ र ३० गते दुई दिन विद्यालयले विद्यार्थीहरू बिचमा आन्तरिक कार्यक्रमहरू गर्ने, पुष १ गतेदेखि ३ गतेसम्म औपचारिक कार्यक्रम हुने र दानवीरलाई सम्मान गर्ने कार्यक्रम रहने उनले बताए ।
