पाणिनि । अर्घाखाँचीमा देउसी भैलो खेलेर उठेको रकमबाट एक विपन्न परिवारलाई सहयोग गरिएको छ ।
जिल्लाको पाणिनि गाउँपालिकाको वडा नम्बर ३ स्थित स्वर्गीय रामु नेपालीको परिवारलाई सहयोग गरिएको हो । दुर्गाफाँटका युवाहरूले देउसी भैलो खेलेर जम्मा गरेको रकमबाट ११ हजार १ सय ११ रुपैयाँ स्वर्गीय नेपालीकी श्रीमती तुलसा नेपालीलाई प्रदान गरेको हो । केही समय पहिला दुर्घटनामा परि ढाड भाँचिएर थाला परेका रामु नेपालीको केही दिन अघि निधन भएको थियो । उनको निधन पश्चात उनीहरूको आर्थिक अवस्था कमजोर रहेको र बालबालिकाको अध्ययनमा सहज होस भन्ने उद्देश्यले रकम सहयोग गरिएको इश्वरी पोखरेलले जानकारी दिए ।
स्वर्गीय नेपालीका १ छोरा १ छोरी र श्रीमती रहेका छन् । उनका छोराछोरीले स्थानीय दुर्वाशेश्वर माध्यमिक विद्यालयमा पढ्दै आएका छन् ।
रकम हस्तान्तरण कार्यक्रममा भैलो समुहका ईश्वरी पोखरेल, किरण अधिकारी, पत्रकार घनश्याम भट्टराई, मिलन गाह, बालकृष्ण नेपाली, कुमार गाह लगायतको उपस्थिति रहेको थियो ।
