अर्घाखाँची । नेपाल विद्यार्थी संघ (नेविसंघ)ले कूल वार्षिक बजेटको न्यूनतम् २० प्रतिशत बजेट शिक्षामा छुट्याउन माग गरेको छ ।
नेविसंघको ५५ औं स्थापना दिवसको अवसरमा बिहिबार अर्घाखाँचीकाे पाणिनि गाउँपालिकामा ज्ञापनपत्र बुझाउँदै स्थानीय सरकारले समेत आफ्नो कुल वार्षिक बजेटको न्यूनतम २० प्रतिशत अनिवार्य सार्वजनिक शिक्षामा विनियोजन गर्नुपर्ने माग राखेको हो ।
वर्तमान शैक्षिक अवस्थाको अनुगमन, अध्ययन एवं अनुसन्धान गर्न तथा आधारभूत र माध्यमिक तहसम्मको शिक्षामा देखिएका साझा समस्या समाधान गर्न माग गर्दै ज्ञापन पत्र बुझाएको केन्द्रीय सदस्य बिकास पाण्डेले जानकारी दिए ।
१७ बुँदे ज्ञापन पत्र बुझाएको नेविसंघले माध्यमिक तह सम्मको शिक्षा निशुल्क हुनुपर्ने, सार्वजनिक शिक्षामा राज्यको लगानी अभिवृद्धि गर्न, नेपालको सार्वजनिक शिक्षाको गुणस्तर वृद्धि गर्न तथा नेपालको संविधानले व्यवस्था गरेको शिक्षासम्बन्धी हकको कार्यान्वयन गर्न माग गरेको छ ।
कार्यक्रममा नेबिसंघ केन्द्रीय सदस्य बिकास पाण्डे, जिल्ला अध्यक्ष कृष्ण भुसाल, निमित्त प्रमुख प्रशासकिय अधिकृत राम प्रसाद घिमिरे, नेपालि कांग्रेस जिल्ला सचिव अच्यूत गौतम, नेबिसंघ पूर्व अध्यक्ष यूवराज पाण्डे, पालिकाका कर्मचारी पत्रकार लगायतको उपस्थिती रहेको थियो।
ज्ञापन पत्र बुझ्दै निमित्त प्रमुख प्रशासकीय अधिकृत राम प्रसाद घिमिरेले माग सम्बोधन गर्ने प्रतिबद्धता व्यक्त गरे । नेबिसंघले अाज देशभरका स्थानीय तहमा ज्ञापनपत्र बुझाएकाे छ ।
