अर्घाखाँची । अर्घाखाँचीको सितगंगा नगरपालिकामा अवैध रुपमा क्लिनिक संचालन भएको छ ।
स्वास्थ्य कार्यालय अर्घाखाचीका कार्यालय प्रमुख सिव नेपाली सहितकाो टोलिले गरेको अनुगमनमा सितगंगामा एउटा अवैध रुपमा संचालन भएको क्लिनिक भेटिएको हो । सितगंगा नगरपालिका वडा नं. ४ अमराईमा संचालन भएको सितगंगा फार्मेसीमा अवैध सेवाहरु संचालन भैरहेका छन् ।
औषधी व्यवसाय गर्न फार्मेसीको अनुमति लिएका एक ब्यक्तिले ओ.पि.डी., ल्याब, एक्स–रे, तथा एमरजेन्सी सेवासहितको क्लिनिक सञ्चालन गरेका छन् । शितगंगा नगरपालिकामा २०७५ चैत ०८ गते केशव भट्टराईको नाममा व्यवसायी फर्म सितगंगा फार्मेसी दर्ता गरि फार्मेसी संचालनको अनुमति लिएर लामो समयदेखि क्लिनिककै सेवाहरु दिइरहेको भेटियो । फार्मेसीका लागि पालिकाबाट अनुमति लिए पुग्छ तर क्लिनिकका लागि पहिला प्रदेशमा दर्ता गर्ने व्यवस्था थियो भने अहिले जिल्ला स्वास्थ्य कार्यालयमा दर्ता गर्नुपर्छ । यस्तै फार्मेसीको लाइसेन्स भने प्रमोद चौधरीको नाममा रहेछ ।
अनुगमनको क्रममा रेबिज विरुद्धको ए.आर.भि. भ्याक्सिन, टि.टि भ्याक्सिन जस्ता थुप्रै भ्याक्सिन तथा औंषधीहरु डोमेस्टिक फ्रिजमा राखिएको भेटियो । यस्तै दुखाइ कम गर्ने डिप्लोफेनाको अधिकतम मुल्य रु. १० सम्म हुनुपर्नेमा त्यहाँ त्यसैलाई रु.१०० सम्ममा बिक्री गरेको थियो ।
फार्मेसीका संचालक केशव भट्टराई आफैंले फार्मेसी, भिडियो एक्सरे लगायत गर्छन्, उनले अध्ययन गरेको अहेव (सि.एम.ए) हो । उक्त फार्मेसीमा ल्याब टेष्टमा सुगर एक्सरे TG choleterol, urine, urea creatinine, uric acid, VDRL cbc समेत गरिन्छ जुन कानुन विपरीत हो । फार्मेसीले औंषधी बिक्री वितरणको मात्र काम गर्न पाइन्छ । फार्मेसीमा एच.ए. एक जना, ल्याब असिस्टेन्ट एक जना कर्मचारी छन् । बेला-बेला डाक्टर समेत आएर चेकजाँच गर्ने गरेको अनुगमनका क्रममा पाइएको छ ।
