- नेपाल प्रेस युनियनका महासचिव दिलिप पौडेलले पत्रकारमाथि धरपकड गर्ने र सञ्चारगृहमा प्रहरी प्रवेश गराउने सरकारको कदम गैरसंवैधानिक भएको आरोप लगाएका छन् ।
- वर्तमान सरकारको गतिविधिले शाहीकालीन शासनको झल्को दिएको र यसले प्रेस स्वतन्त्रतामाथि सीधा हस्तक्षेप गरेको उनको भनाइ छ ।
- प्रेसमाथिको यस्तो प्रहारले लोकतन्त्रको घाँटी निमोठ्ने काम भएको भन्दै उनले सरकारलाई पतनको बाटोतर्फ नलैजान चेतावनी दिएका छन् ।
काठमाडौं । नेपाल प्रेस युनियनका महासचिव दिलिप पौडेलले पत्रकारमाथि धरपकड गर्ने र सञ्चारगृहमा प्रहरी प्रवेश गराउने सरकारको कदम गैरसंवैधानिक भएको आरोप लगाएका छन् ।
शनिबार काठमाडौंमा आयोजित अन्तरक्रिया कार्यक्रममा बोल्दै पौडेलले वर्तमान सरकारको गतिविधिले शाहीकालीन शासनको झल्को दिएको टिप्पणी गरे । उनले प्रेस स्वतन्त्रतामाथिको हस्तक्षेपले लोकतान्त्रिक मूल्य र मान्यतामाथि प्रहार गरेको आरोपसमेत लगाए ।
पौडेलले सरकार गठन भएलगत्तै सञ्चारमाध्यमलाई दिइने विज्ञापन रोकिएको र त्यसपछि पत्रकार पक्राउ गर्ने क्रम बढेको दाबी गरे । अहिले सञ्चारगृहमा प्रहरी प्रवेश गराउने र पत्रकारमाथि धरपकड गर्ने गतिविधि भइरहेको भन्दै उनले सरकारको कार्यशैलीप्रति आक्रोश व्यक्त गरे ।
‘बालेन सरकार आउनेबित्तिकै विज्ञापन रोकेर आर्थिक नाकाबन्दी गर्यो, त्यसपछि लगातार पत्रकार पक्रने कार्य जारी भयो । अहिले आएर शाहीकाललाई माथ खुवाउने अभ्यास गरिएको छ,’ उनले भने ।
सरकारको यस्तो कदमले प्रेस स्वतन्त्रतामाथि सीधा हस्तक्षेप गर्दै लोकतन्त्रको घाँटी निमोठ्न खोजेको उनको आरोप थियो । प्रेसमाथिको प्रहारले सरकारलाई नै पतनको बाटोतर्फ लैजाने चेतावनीसमेत उनले दिएका छन् ।
पौडेलले पत्रकारिता क्षेत्रको स्वतन्त्रता र सञ्चारमाध्यमको संवैधानिक अधिकारमाथि हस्तक्षेप नगर्न सरकारलाई आग्रह गरेका छन् ।
