बुटवल । श्री रामनगर सामुदायिक उपभोक्ता समुहको आयोजना र कानुन विद्यार्थी समाज कालिकाको समन्वयमा विद्यार्थीलाई वन ऐन र कार्यविधिबारे थप जानकारी दिने उद्देश्यले बिहीबार बुटवल–१० रामनगर, श्री रामनगर सामुदायिक वन उपभोक्ता समुहको सभाहलमा वनसँग विद्यार्थी कार्यक्रम सम्पन्न भएको छ ।
रामनगर सामुदायिक वन उपभोक्ता समुहका अध्यक्ष रुद्र बहादुर हमालको अध्यक्षतामा भएको उक्त कार्यक्रममा तिलोत्तमा सबडिभिजन वन कार्यालयका प्रमुख अधिकृत सूर्य प्रसाद मैनालीले प्रमुख अतिथि रहेको थियो । कार्यक्रमको प्रशिक्षक समेत रहेका मैनालीले अर्ध न्यायिक निकाय अन्तर्गत वन कार्यालयले गर्ने न्यायिक निरोपणको कार्यविधि र वन ऐन शीर्षकमा प्रशिक्षण दिएका थिए । वन कार्यालय अर्धन्यायिक निकाय भएपनि ऐनको अस्पष्टताका कारण न्यायिक निरोपण गर्न केही हद सम्म डिभिजन कार्यालय असक्षम रहेको मैनालीले बताए ।
कार्यक्रममा बोल्दै उपभोक्ता समुहका अध्यक्ष रुद्र बहादुर हमालले सो उपभोक्ता समुहले गरिब तथा असहायलाई कृया खर्च स्वरुप पाँच हजार रुपैयाँ र काठ दाउरा प्रदान गर्दै आएको बताए । जङ्गलको जनावरलाई बाह्रैमास जलपानको लागि जङ्गलमा दुई पोखरी निर्माण गरेको र रूख बिरुवा संरक्षणको लागि नम्बरिङ तथा दूरी मापनको काम गरेको बताए ।
कार्यक्रम कानुन शिक्षक युवराज कँडेलको सहजिकरणमा सम्पन्न भएको थियो ।
