बुटवल । नेपाली कांग्रेसका महामन्त्री गगन कुमार थापाले अर्थतन्त्र बिग्रनुको मुख्य कारण माओवादीको १० वर्षे युद्ध र हिंसा रहेको बताएका छन् ।
नेपाली कांग्रेसको लुम्बिनी प्रदेश सम्मेलनमा बोल्दै महामन्त्री थापाले यस्तो बताएका हुन् । उनले २०४८ देखी २०५१ सालसम्म गिरिजा प्रसाद कोइरालाले नेतृत्व गरेको समय नेपालका लागि स्वर्णिम युग रहेको जिकिर गर्दै त्यसपछि माओवादीले अनावश्यक युद्धको भारी बोकाएको आरोप लगाए । उनले भने “आज हामीले अर्थतन्त्रको जुन अवस्था भोगेका छौँ, यसलाई अलिकति मात्रै पल्टाएर हेर्यौ भने यसको मुख्य कारण भनेको माओवादीले हामीलाई नेपाली समाजमा थोपार्दीएको अनावश्यक युद्ध र हिंसाको कारणले गर्दा हो ।”
उनले अर्थतन्त्र बिग्रनु युद्ध र त्यसका परिणाम नै मुख्य कारक रहेको पटकपटक दोहोर्याउँदै भूकम्प र कोभिडका कारण पनि अर्थतन्त्र थप जटिल बनेको बताए । तर पछिल्लो समय अर्थतन्त्रका केही सूचक सुधारिएको अवस्था रहेका थापाको भनाई छ । उनले भने “ बिस्तारै हामी केही दिनदेखि हेर्दै छौँ, हाम्रा केही कुराहरू सकारात्मक बन्दै गएको छ । हामीसँग आज बैंकमा यति मुद्रा छ की हामी १७/१८ महिना चिन्ता गर्न नपर्ने अवस्थामा पुगेका छौ, केही महिनाअघि जम्मा ६ महिनालाई बाँकी हुने अवस्था भएको थियो । कहाली लाग्दो अवस्था भएको थियो ।”
