“यो भाग्यले आउन पाइने थलो हो, वडाध्यक्षको कारण सम्भव भयो । वडाध्यक्षलाई धन्यवाद ।” यो भनाई पाणिनी गाउँपालिका वडा नम्बर ६ धातिवाङबाट तिर्थयात्रा गर्न प्युठानको स्वर्गद्वारी पुगेका भिमलाल पौडेलको हो । भिमलाल पौडेल जस्तै पाणिनि गाउँपालिका वडा नम्बर ६ का ४५ जना वृद्धबृद्धा स्वर्गद्वारी पुगेका थिए ।
पाणिनी गाउँपलिका वडा नम्बर ६ ले आर्थिक वर्ष २०८०/८१ को स्वीकृत बजेट अनुसार जेष्ठ नागरिक सम्मान कार्यक्रम अन्तर्गत ४५ जना जेष्ठ नागरिकहरुलाई नेपालका सातधाममध्येको एक धाम स्वर्गद्वारी तिर्थयात्रामा लगेको थियो । सो यात्रामा सहभागी जेष्ठ नागरिकहरु पहिलोपटक स्वर्गद्वारी तिर्थयात्रा गर्न पाएकोमा खुसी थिए ।
वडा कार्यालयले वडा भित्रका ६८ वर्षमाथीका इच्छुक जेष्ठ नागरिकलाई तिर्थयात्रा गराएको थियो । वडा कार्यालय कै व्यवस्थापनमा सामुहिक तिर्थयात्रा गर्न पाएकोमा जेष्ठ नागरिकहरु खुसी मात्र थिएनन्, वडा अध्यक्षको खुलेरै प्रशंसा गर्दै यो कार्यक्रमको निरन्तरताको माग समेत गरे । उनिहरुले भने, “तिर्थयात्रा गर्नु भन्दा यात्रा गराउनु अज पबित्र र पुन्यको काम हो, अझै यस्तै राम्रो काम गर्दै जानू ।”
गत वर्ष पनि तिर्थयात्राको लागि पबित्र तिर्थस्थल रिडिधाम लगेको स्मरण गर्दै वडा अध्यक्ष कृष्ण पौडेलले जेष्ठ नागरिकको चाहाना र आफ्नो घोषणापत्र अनुसार नै यो कार्य गरेको बताए । उनले भने, ” सम्मानका फरक फरक शैली हुन्छन्, अन्य वडाहरुले दोसल्ला ओडाएर, हर्लिक्स तथा विभिन्न भौतिक सामाग्री दिएर सम्मान गरेका हुन्छन तर हामिले तिर्थयात्रा गराउने निर्णय गर्यौं । यस कार्यमा जेष्ठ नागरिक एक्दमै खुसी हुनुहुन्छ ।”
जेष्ठ नागरिक सहितको यात्रामा जेष्ठ नागरिकको स्वाथ्यमा हुनसक्ने सम्भावित समस्याको मध्यनजर गर्दै धातिवाङ स्वास्थ्य चौकी प्रमुख मित्रदेव पौडेल सहितको टोलि पनि सहभागी रहेको थियो ।
विक्रम सम्बत १९५२ मा महाप्रभुले महायज्ञ गरेर स्थापना भएको यस मन्दिरमा पवित्र मनले दर्शन गरे मात्र पनि स्वर्ग पुगिने धार्मिक मान्यता रहेको छ ।
