बंगलादेशमा आम निर्वाचन नजिकिँदै गर्दा हिंसा भड्किएको छ। आइतबार हुन लागेको आम निर्वाचनअघि राजधानी ढाका लगायतका विभिन्न शहरमा हिंसा भड्किएको अधिकारीहरूले जनाएका छन्।
शुक्रबार दिउँसो देशका विभिन्न शहरमा प्रदर्शन गरेका प्रदर्शनकारीले राति राजधानी ढाकामा रेलमा आगजनी गरेका छन्, जसमा पाँचजनाको मृत्यु भएको छ भने कैयौँ व्यक्ति घाइते भएका छन्। दुई हप्ताअघि पनि एक रेलमा आगजनी हुँदा ४ जनाको मृत्यु भएको थियो। बंगलादेशमा आइतबार १२ औँ आम निर्वाचन हुँदैछ। जसमा झण्डै १५ वर्षदेखि प्रधानमन्त्री रहेकी शेख हसिना पाँचौ पटक प्रधानमन्त्री पदको दाबेदार छिन्।
आफ्नो प्रधानमन्त्रीकालमा विपक्षी दलका प्रभावशाली नेतालाई विभिन्न आरोपमा जेल हालेकी हसिना पुनः प्रधानमन्त्रीको दौडमा रहँदा विपक्षीले निर्वाचन बहिस्कारको घोषणा गरेका छन्।
सन् २००९ देखि देशको प्रधानमन्त्री रहेकी शेख हसिनाले विपक्षी दलकी नेतृ तथा पूर्वप्रधानमन्त्री खालिदा जिया र उनका छोरा तारिक रहमानमाथि विदेशी बैंकमा पैसा जम्मा गरेको आरोप लगाउने गरेका छन्। विपक्षी दलहरूले भने प्रधानमन्त्री हसिनाले शक्तिको दुरुपयोग गरेको र अनियमिता गरेको आरोप लगाउँदै आएका छन्।
