बुटवल । लुम्बिनी प्रदेशका सभामुख तुलाराम घर्तीले संघीयताको कार्यान्वयनका लागि तीनवटै तहका सरकारको सहकार्य र समन्वय जरुरी रहेको बताएका छन् ।
लुम्बिनी प्रदेश सभा र स्थानीय तहबीच कानुन निर्माण तथा सभा सञ्चालन सम्बन्धी बुधबार बुटवलमा आयोजित अन्तरक्रिया कार्यक्रमपछि पत्रकारहरूसँग कुराकानी गर्दै सभामुख घर्तीले यस्तो बताएका हुन् । उनले तीन तहकै सरकार एक अर्कामा अन्तर सम्बन्धित नभए संघीयता कार्यान्वयन गर्न नसकिने बताए । उनले भने,“ हामीले संघ, प्रदेश र स्थानीय तहलाई एकीकृत बहसमा नलग्ने हो भने, सँगसँगै जोडेर नलग्ने हो भने, अन्तरसम्बन्धित भएर अगाडि नबढ्ने हो भने, कानुन निर्माण र विकास निर्माणका सवालमा अन्तरसम्बन्धित र एकले अर्काको अस्तित्व स्वीकार गरेर एकले अर्कालाई सहयोग गर्ने सहयोगीका भूमिका निभाउन नजान्ने हो भने संघीयता कार्यान्वयन गर्न सकिदैन ।”
संघीय संरचनाको सबैभन्दा नयाँ र अपरिचित संरचना प्रदेश भएको हुँदा यसलाई सही कार्यान्वयनको लागि सबै तहका सरकारसँग सहकार्य जरुरी रहेको उनको भनाई थियो । स्थानीय तह गाउँपालिका तथा गाविसको रुपमा र संघीय सरकार पनि पहिला देखि चलेको भन्दै प्रदेशलाई स्थापित गर्नु अहिलेको आवश्यकता रहेको उनको उनको भनाई छ । “संघीय संरचनाको, संघीय शासन प्रणालीको सबभन्दा महत्वपूर्ण र नितान्त नयाँ अपरिचित संरचना भनेको प्रदेश संरचना हो” उनले भने “प्रदेशलाई जनताको दिल दिमागसम्म, स्थानीय जनप्रतिनिधिको दिल दिमागसम्म संघीयतालाई स्थापित गर्नुपर्ने छ ।”
विकास निर्माणका लागि सरकारसँग र कानुन निर्माणमा प्रदेश सभासँग समन्वय गर्न स्थानीय तहका जनप्रतिनिधिहरूलाई सभामुखले आग्रह समेत गरे । स्थानीय तह संघीयताको जग भएको भन्दै सभामुख घर्तीले अधिकांश स्थानीय तहले कानुन नबनाई कार्यविधिबाट सञ्चालन भएको पाइएको बताए ।
