अर्घाखाँची । अर्घाखाँचीमा सम्पन्न १३ औँ राष्ट्रपति रनिङ शिल्ड प्रतियोगिताको उपाधि सन्धिखर्क नगरपालिकाले जितेको छ ।
माघ १४ गते देखि १६ गतेसम्म सञ्चालन भएको रनिङ शिल्ड प्रतियोगितामा सन्धिखर्कले छात्र र छात्रातर्फ गरी २२ मेडल सहित शिल्ड, मेडल, प्रमाणपत्र प्राप्त गरेको हो । सन्धिखर्कले १२ स्वर्ण, ५ रजत र ५ काश्य गरी २२ मेडल प्राप्त गरेको हो । सन्धिखर्कले भलिबल छात्रा तर्फ स्वर्ण, भलिबल छात्र तर्फ काश्य तथा कबड्डीको छात्र र छात्रा दुवैतर्फ काश्य र एथलेटिक्सका १३ खेलमा छात्र, छात्रा दुवैतर्फ ११ स्वर्ण, ५ रजत, २ काश्य गरी २२ मेडल प्राप्त गर्यो ।
गत वर्ष उपाधि विजेता भूमिकास्थान नगरपालिका दोस्रो भएको छ भने पाणिनि गाउँपालिकाले तेस्रो स्थान हासिल गरेको छ । भूमिकास्थान नगरपालिकाले कबड्डीको छात्र र छात्रा दुर्बतर्फ स्वर्ण र एथलेटिक्सका १३ खेलमा छात्र, छात्रा दुवैतर्फ ६ स्वर्ण, ५ रजत, ५ काश्य गरी १८ मेडल प्राप्त गर्यो ।
तृतीय पाणिनि गाउँपालिकाले भलिबल छात्र तर्फ स्वर्ण, छात्रा तर्फ काश्य र एथलेटिक्सका १३ खेलमा छात्र, छात्रा दुवैतर्फ २ स्वर्ण, ८ रजत, ५ काश्य गरी १६ मेडल प्राप्त गर्यो ।
त्यस्तै सितगंगा नगरपालिकाले २ स्वर्ण ५ रजत ६ काश्य गरी १३ मेडल प्राप्त गरेको छ । मालारानी गाउँपालिकाले ३ स्वर्ण, ३ रजत र ४ काश्य गरी १० मेडल प्राप्त गर्यो भने छत्रदेव गाउँपालिकाले २ स्वर्ण, ४ रजत र ४ काश्य गरी १० मेडल प्राप्त गरेको छ ।
प्रतियोगितामा भलिबल र कबड्डी तथा एथलेटिक्स तर्फ १०० मिटर, २०० मिटर, ४०० मिटर, ८०० मिटर, १५०० मिटर, ३००० मिटर दौड, ४ १०० मिटर, ४ ४०० मिटर रिले दौड, लङजम्प, त्रिपल जम्प, हाइजम्प, सटपुट, ज्यावलिङ्ग थ्रो गरी १५ वटा खेलमा छात्र र छात्रालाई प्रतिस्पर्धा गराइएको थियो । प्रतियोगितामा अर्घाखाँचीका ६ वटै स्थानीय पालिकाबाट झण्डै ५ सय ५० खेलाडीहरू सहभागी थिए ।
जिल्लामा उत्कृष्ट भएका खेलाडीहरू प्रदेशस्तरीय रनिङ शिल्ड प्रतियोगितामा सहभागी बन्ने जिल्ला खेलकुद विकास समिति अर्घाखाँचीले जनाएको छ ।
