अर्घाखाँची । नेकपा एकीकृत समाजवादी अर्घाखाँचीको ९ औं पूर्ण बैठक सम्पन्न भएको छ ।
नेकपा एकीकृत समाजवादीको पूर्ण बैठकका प्रमुख अतिथि एवं पार्टी पोलिटब्युरो सदस्य मेटमणि चौधरीले पार्टी संगठन निर्माणको काममा एकताबद्ध भएर लाग्नुपर्ने बताए । प्रतिनिधि सभा सदस्य चौधरीले नेपालको पुरानो खालको राजनैतिक संस्कारलाई बदल्नु पर्ने भन्दै पार्टी संगठन निर्माणका लागी सहभागिता मूलक छलफल, सामूहिक निर्णय, कार्यक्रम तथा बैठक सञ्चालन विधि अगाडि बढ्नु पर्ने बताए । पूर्व सहरी विकासमन्त्री समेत रहेका चौधरीले पार्टीले आगामी महाधिवेशनबाट पार्टी नयाँ गतिका साथ अगाडि जाने भन्दै अब मनमा भएको निरास हटाई उत्साहका साथ पार्टी संगठन निर्माणको काममा लाग्न निर्देशन गरे ।
नेता चौधरीले एमाले अहिले मुद्दा विहीन भएको र अब जति नै नक्कली कुरा गरे पनि जनताले बुझेको भन्दै एमालेको भविष्य समाप्त हुन लागेको बताए । आगामी निर्वाचन सम्मको यो विद्रोहको यात्रा निकै चुनौतीपूर्ण भन्दै अब सामाजिक मुद्दालाई एजेन्डा बनाई सबैखाले समस्यासँग जुध्दै अगाडि बढ्नु पर्ने नेता चौधरीले बताए ।
पार्टीका केन्द्रिय सदस्य अर्घाखाँची जिल्ला इन्चार्ज पिताम्बर सारुले अब नयाँ सोचका साथ युवा नेतृत्वबाट अगाडि बढ्नु पर्ने भन्दै विद्रोहको औचित्य मिसन पूरा गर्ने गरि लाग्नु पर्ने बताए । नेता सारुले अब अझ सशक्त तवर पार्टी काममा लाग्न सबैलाई आग्रह गरे ।
बैठकमा पार्टी लुम्बिनी प्रदेश कमिटी सदस्य, मोतीलाल श्रीपाली, सुनिता बेल्बासे, समाजवादी प्रेस सङ्गठनका लुम्बिनी प्रदेश अध्यक्ष हृदय भुसाल, पार्टी राष्ट्रिय परिषद सदस्य मुकुन्द रोकाले बैठकमा महत्त्वपूर्ण भनाई राखेका थिए । बैठकमा प्रदेश कमिटी सदस्य तारापति भट्टराई, विष्णुहरि भुसाल, अनेरास्ववियु केन्द्रिय नेता नारायण शर्मा लगायतको आतिथ्यता रहेको थियो ।
बैठकले आगामी २ महिने पार्टी संगठन सुदृढीकरण तथा सदस्यता बिस्तार अभियान अगाडि बढ्ने त्यसका लागी बिभिन्न पालिकामा सहजकर्ताहरू तोकिएको साथै पार्टी संगठन निर्माणका लागी महत्त्वपूर्ण निर्माण भएको अध्यक्ष राम बहादुर चौहानले बताए । बैठक पार्टी जिल्ला कमिटी अध्यक्ष राम बहादुर चौहानको अध्यक्षता, उपाध्यक्ष सिद्धि प्रसाद भुसालको स्वागत मन्तव्य र सचिव युवराज पौडेलको संचालनमा बैठक सम्पन्न भएको थियो ।
