दोहा, कतार : शान्तिका अग्रदूत भगवान गौतम बुद्धको २५६८औं जन्म जयन्ती कतारमा भव्यरूपमा मनाइएको छ । गैरआवासीय नेपाली संघ राष्ट्रिय समन्वय परिषद् (एनआरएनए एनसीसी) र नेपाल आदिवासी जनजाति महासंघ, कतारको समन्वयमा कतारमा स्थापित विभिन्न ९१ संघसंस्थाको संयुक्त आयोजनामा बुद्ध जयन्ती मनाइएको हो । संघका अध्यक्ष रमेश भट्टको सभापतित्व तथा कतारका लागि नेपाली राजदूत डा. नरेश विक्रम ढकालको प्रमुख आतिथ्यतामा नेपाली दूतावासमा शुक्रबार बिहान बुद्ध जयन्ती मनाइएको हो ।
धर्म गुरुहरू बेन्दे लामा, सिर्कु मनाङथेन तामाङ, चन्द्र लामा, सूर्यमान तामाङ, अनिता लामा र पुष्पा लामाले मोवम मन्त्रसँगै त्रियुगा बन्धन गरेपश्चात राष्ट्रिय गानसहित कार्यक्रमको शुभारम्भ गरिएको थियो । गुरुहरूले बुद्धको जन्म जयन्ती, बुद्धत्व प्राप्त, बुद्धपदा निर्वाण, त्रियुग संहारका बारेमा व्याख्या समेत गरेका थिए । कार्यक्रममा शुभकामना मन्तव्य दिने वक्ताहरूले बुद्ध जयन्तीको समयमा मात्रै नभइ बुद्धको सन्देशलाई सबैले सदैव अनुसरण गर्नुपर्ने बताए । विश्वसामु नेपाललाई चिनाउने विभूति पञ्चशीलतालाई अनुसरण गरेमा देशमा भइरहेका अशान्ति, हत्या, हिंसाको अन्त्य भइ मुलुक शान्ति र सत्मार्ग तिर उन्मुख हुने विश्वास वक्ताहरूले व्यक्त गरेका थिए ।
कार्यक्रमका प्रमुख अतिथि ढकालले बुद्ध सन्देशलाई अनुसरण गर्दै अगाडि बढ्नका लागि प्रेरित हौं भन्ने शुभेच्छा प्रकट गरेका थिए । विचार, दर्शन र व्यवहार सँगसँगै हिँडाउन सक्ने मानिस सफल हुने बताउँदै बुद्धका गुणहरू अनुसरण गर्न आग्रह गरे । बुद्ध सबै धर्मावलम्बीका साझा अनुयायी रहेको बताउँदै मानिसहरू अहिंसाको बाटो हिँड्न चुकिरहेको उनको भनाइ थियो । बुद्ध धर्मको अनुयायी हुनु र अनुयायी बन्नु बीच फरक रहेको बताउँदै नेपालमा केही शक्ति ॐ शब्द सीमित समुदाय र जातको रहेको भन्दै हटाउन लागिपरेकोप्रति सचेत गराउँदै आस्थावानहरु संवेदनशील रहन आग्रह गरे ।
कार्यक्रमको समापन गर्दै सभापति भट्टले बुद्धको देशमा जन्मिएका हामी नेपाली शान्तिका दूत रहेको बताए । उनले बुद्धका वाणी व्यवहारिक रुपमा अनुसरण गरी भाइचाराको भूमिका निर्वाह गर्न आग्रह गर्दै भारतले बुद्धमाथि अतिक्रमण गरी गलत प्रचार प्रसार गरेको बताउँदै सचेत रहनुपर्ने धारणा राखेका थिए । कतारका अग्रज, बुद्घिजिवी लगायतको बाक्लो उपस्थिति रहेको कार्यक्रममा जीवन योग प्रयोगशाला दोहा कतारका तर्फबाट योगसम्बन्धी ध्यान योग गराइएको थियो ।
कृष्ण पन्थीको स्वागत मन्तव्यबाट शुरु भएको कार्यक्रमका बारेमा जनजाति महासंघका अध्यक्ष डियन मगरले प्रष्ट पारेका थिए । जनजाति महासंघ कतारका महासचिव हरि महतोले सहजीकरण गरेको कार्यक्रममा नेपाल मगर संघ शाखा कतार, तमु (गुरुङ) समाज कतार, नेपाल प्रवासी तामाङ समाज, शेर्पा किदुगं दोहा कतार र थारु कल्याणकारी सभा कतार च्याप्टर तथा नेपाल तामाङ घेदुङ प्रवास कार्यसमिति कतारले पूजा अर्चनाको व्यवस्था गरेका थिए ।
