अर्घाखाँची । अर्घाखाँची जिल्लाको शितगंगा नगरपालिकाले प्लास्टिकका मालाहरुको विक्रीमा रोक लगाएको छ ।
नगरपालिकाले नगर क्षेत्रभित्र तिहारको समयमा प्लास्टिकका मालाको विक्री र प्रयोगमा पूर्ण प्रतिबन्ध लगाएको हो । नगरले एक सूचना जारी गर्दै स्थानीय फूलहरूको प्रवर्द्धन गर्नुका साथै प्लास्टिकजन्य फोहोरको समस्या न्यूनीकरण गर्ने उद्देश्यले यो निर्णय गरिएको नगरपालिकाले जनाएको छ ।
तिहारको समयमा प्लास्टिकका मालाहरुको प्रयोग बढ्ने हुँदा यसले वातावरणमा फोहोरको मात्रा वृद्धि गर्ने र स्थानीय फूलहरूको प्रयोग घटाउने गरेको देखिएको छ । नगरपालिकाको बैठकले उक्त निर्णय गर्दै सबै वडा कार्यालय, प्रहरी प्रशासन, र उद्योग वाणिज्य संघलाई यो निर्णय कार्यान्वयन गर्न निर्देशन दिएको छ।
प्रमुख प्रशासकीय अधिकृत मदनबहादुर जिसीद्वारा हस्ताक्षरित पत्रमा यो निर्णय तत्काल लागू गर्ने र नगरवासीहरूलाई यसमा सहयोग गर्न आग्रह गरिएको छ । स्थानीय उत्पादनहरूको प्रवर्द्धनमा यो निर्णय महत्वपूर्ण हुने अपेक्षा गरिएको छ, जसले स्थानीय फूल व्यवसायलाई पनि प्रोत्साहन दिनेछ।
यस कदमले नगर क्षेत्रमा प्लास्टिकजन्य प्रदूषण कम गर्ने र वातावरणीय सन्तुलन कायम राख्न मद्दत पुर्याउने विश्वास नगरपालिकाले गरेको छ। साथै स्थानीय अर्थतन्त्रमा सकारात्मक प्रभाव पार्ने अपेक्षा गरिएको छ।
