अर्घाखाँची । पाणिनी गाउँपालिकाको दोस्रो गाउँसभाको छैटौँ अधिवेशन सम्पन्न भएको छ। अधिवेशनले दुईवटा विधेयक पारित गरेको छ।
गाउँसभाले “पाणिनी गाउँपालिकाको कृषि तथा पशुपन्छी व्यवस्थापन गर्न बनेको विधेयक, २०८१” र “स्थानीय वन सञ्चालन तथा व्यवस्थापन गर्न बनेको विधेयक, २०८१” सर्वसम्मतिले पारित गरेको हो। यी विधेयकहरू पारित भएसँगै गाउँपालिकाले कृषि, पशुपन्छी तथा वन व्यवस्थापनमा थप प्रभावकारी नीति लागू गर्ने अपेक्षा गरिएको छ।
यस अधिवेशनमा समसामयिक विषयहरूमा पनि छलफल गरिएको गाउँपालिकाका प्रमुख प्रशासकीय अधिकृत रोमनाथ न्यौपानेले जानकारी दिए। गाउँपालिकाको विकास, बजेट कार्यान्वयन, पूर्वाधार निर्माण तथा सेवा प्रवाहलाई प्रभावकारी बनाउन विविध विषयमा छलफल भएको उनले बताए।
गाउँपालिका अध्यक्ष टेकराज न्यौपानेले पारित विधेयकहरूले स्थानीय तहको विकासलाई सुदृढ बनाउने विश्वास व्यक्त गरे। यी विधेयकहरुमार्फत गाउँपालिकाभित्र कृषि, पशुपालन तथा वन व्यवस्थापनलाई थप व्यवस्थित र प्रभावकारी बनाउने लक्ष्य राखिएको उनको दावि छ।
गाउँसभामा गाउँपालिका अध्यक्ष, उपाध्यक्ष, वडाध्यक्षहरू, जनप्रतिनिधिहरू, कर्मचारी तथा सरोकारवालाहरूको उपस्थिति रहेको थियो।
