“रक्तदान जिवनदान”भन्ने मुल नारालाई आत्मसात गर्दै “नवलपरासी सेवा समाज कतार”ले बृहत रक्तदान कार्यक्रम आयोजना गर्ने भएको छ। नेपाली रक्तदाता संघ कतार र लुम्बिनी प्रदेश समन्वय परिषद कतारको समन्वयमा आगामी मे १६ तारिकमा कतारको हमाद अस्पतालको राष्ट्रिय रक्तदान सेन्टरमा उक्त कार्यक्रम गर्न लागेको समाजका अध्यक्ष दुर्गा हमालले समाचार पोस्टलाई बताएका हुन।
समाजले एक सूचना मार्फत कतारमा स्थापित सम्पुर्ण संघ- संस्थाका प्रमुख तथा प्रतिनिधिहरु,सामाजिक तथा बुद्धिजीवी वर्गहरु,सामाजिक अभियान्ताहरु लगायत कतारमा बसोबास गर्नुहुने सम्पुर्ण नेपाली दाजुभाइ तथ दिदिबहिनीहरुमा यस पुण्य कार्यमा सहभागिताका लागि अनुरोध गरेको छ ।
कतार प्रवेश गरेको चार महिना पूरा भएका जोकोहिले पनि रक्तदान गर्न सकिने भएकोले रक्तदाताहरुले रक्तदान गर्न आउँदा आफ्नो परिचय खुल्ने कागजात ( कतारी आइडी , लाइसेन्स वा हेल्थ कार्ड ) अनिवार्य रुपमा लिएर आउनुपर्नेछ । साथै रक्तदाताले यदि पहिला पनि रक्तदान गरेको भए रक्तदान गरेको दुई महिना पूरा भएको , मदिरापान सेवन नगरेको ,दिर्घरोग नभएको , कुनै पनि खालको एन्टिबायोटिक औषधि प्रयोग नगरेको , कम्तिमा आठ घण्टा सुतेको हुनुपर्नेछ भनें रक्तदाताको उमेर १८-६५ वर्ष साथै तौल कम्तिमा ५० केजि हुनुपर्ने कुरा आयोजकले जनाएको छ ।
उक्त मानविय तथा पुण्य कार्यमा सहभागी हुन ईच्छुकहरुको सहजताका लागि आयोजकले निशुल्क यातायातको व्यवस्था समेत गरेको संस्थाका उपाध्यक्ष एवम् कार्यक्रमका संयोजक नर बहादुर थापाले जानकारी दिएका छन् । थप सहजताका लागि महासचिव चन्द्र गुरुङ ७७४१३६१६ र संस्थाका अध्यक्ष दुर्गा हमाललाई पनि (७७७१७९०८) मा सम्पर्क गर्न सक्नु हुनेछ ।
