अर्घाखाँची । पाणिनि गाउँपालिका वडा नम्बर ७ ले दुई प्रमुख सूचकहरु राजस्व संकलन र योजना कार्यान्वयन दुबैमा उत्कृष्टता हासिल गर्दै पालिकाभित्र सबैभन्दा उत्कृष्ट वडाको रुपमा सम्मान प्राप्त गरेको छ।
गाउँपालिकाको प्रोत्साहन, पुरस्कार तथा सम्मान सम्बन्धी मापदण्ड २०८१ अनुसार मंगलबार सम्पन्न गाउँसभा बैठकमा वडाको समग्र कार्यसम्पादनलाई मूल्यांकन गरी यो सम्मान प्रदान गरिएको हो।
राजस्व संकलनतर्फ वडा नं. ७ ले यो आर्थिक वर्षमा सबैभन्दा धेरै राजस्व कुल ९ लाख ५४ हजार ४ सय ६४ रुपैयाँ ९६ पैसा संकलन गर्न सफल भएको छ।राजस्व शाखा प्रमुख कमल न्यौपानेका अनुसार वडा नं. ८ दोस्रो स्थानमा रह्यो, जसले वडा नं. ७ को तुलनामा १६ हजार रुपैयाँ कम राजस्व संकलन गरेको हो।
त्यस्तै, योजना तथा कार्यक्रम कार्यान्वयनको पक्षमा पनि वडा नं. ७ अग्रस्थानमा देखिएको छ। यस वडाले जेष्ठ मसान्तसम्ममा ६८.९७ प्रतिशत योजना तथा कार्यक्रम सम्पन्न गरेको थियो। कार्यान्वयनको आधारमा वडा नं. २ दोस्रो स्थानमा परेको गाउँपालिकाले जनाएको छ।
सम्मानपछि वडा नं. ७ का वडाध्यक्ष गुनाखर अधिकारिले समाचारपोष्टसंग भने, “स्थानीय जनताको सक्रियता र वडा कार्यालयको समर्पित प्रयासले यो सम्भव भएको हो। यसले आगामी वर्षमा अझ प्रभावकारी योजना कार्यान्वयनको बाटो खोल्नेछ।
गाउँपालिकाका अनुसार यस्तो सम्मानले वडाहरूलाई अझ परिणाममुखी र उत्तरदायी बनाउने विश्वास लिइएको छ।
