अर्घाखाँची । पाणिनि गाउँपालिकास्थित व्यवसायीहरूको साझा संगठन पाणिनि चेम्बर अफ कमर्सको तदर्थ समितिको संयोजकमा अर्जुन पोखरेल चयन भएका छन् । शनिबार बसेको बैठकले सर्वसम्मत रूपमा पोखरेललाई संयोजकको जिम्मेवारी दिने निर्णय गरेको हो ।
बैठकमा उपस्थित सदस्यहरूले संस्थाको नेतृत्व क्षमता, संगठनप्रतिको सक्रियता र व्यवसायी हितका सवालमा पोखरेललाई उपयुक्त उम्मेदवार ठहर गर्दै संयोजक पदमा चयन गरेका हुन् ।
चेम्बरको हिरक महोत्सवको अवसरमा अर्घाखाँची चेम्बरको मातहतमा रहने गरि पाणिनि चेम्बर अफ कमर्सको तदर्थ समिती गठन गरिएको हो । बैठकले विभिन्न पदाधिकारी र सदस्यहरूको जिम्मेवारी पनि तोकेको छ ।
पोखरेलको नेतृत्वमा गठित समितिको बैठकले सहसंयोजकमा संसोद्दिन मियाँ सहित २१ सदस्यीय समिती चयन गरेको छ ।
संयोजकमा चयन भएलगत्तै अर्जुन पोखरेलले चेम्बर अफ कमर्सलाई व्यवसायीहरूको साझा मंचका रूपमा थप सबल र सक्रिय बनाउने प्रतिबद्धता व्यक्त गरे । उनले भने, “पाणिनी क्षेत्रमा रहेका उद्योग, व्यवसाय, कृषि र सेवाक्षेत्रको प्रवर्द्धन, संरक्षण र समस्या समाधानमा चेम्बरले अबको दिनमा अझै ठोस पहल गर्नेछ । व्यवसायमैत्री वातावरण बनाउन, लगानी आकर्षित गर्न र उद्यमशीलतालाई प्रोत्साहन गर्न हामी निरन्तर काम गर्नेछौँ ।”
बैठकमा उपस्थित सदस्यहरूले पाणिनि क्षेत्रमा व्यवसायसँगै पर्यटन, कृषि उत्पादन, सहकारी र सेवाक्षेत्रलाई चेम्बरमार्फत थप सशक्त बनाउनुपर्नेमा जोड दिएका थिए । साथै, गाउँपालिकासँगको सहकार्यमा नीतिगत समस्या समाधान तथा व्यवसायीलाई राहत र सुविधा दिलाउने विषयलाई पनि प्राथमिकतामा राख्ने प्रतिवद्धता बैठकले गरेको छ ।
आगामी तीन महिनामा यस तदर्थ समितिले पाणिनि भित्रका सम्पूर्ण व्यवसायीहरु समेटेर अधिवेशन गरि कार्यसमिति चयन गर्ने छ ।
कार्यक्रममा चेम्बर अफ कमर्सका लुम्बिनी प्रदेश सदस्य सुकदेव बेल्बासे, चेम्बर अफ कमर्स अर्घाखाँचीका अध्यक्ष अशोक कुमार श्रेष्ठ, वरिष्ठ उपाध्यक्ष लिलाधर बस्याल, सचिव प्रेम थापा, पाणिनी गाउपालिका वडा नं. ३ का वडाअध्यक्ष युवराज ज्ञवाली, वडा नं. ४ का वडाअध्यक्ष हरि प्रसाद घिमिरे, वडा नं. ७ का अध्यक्ष गुनाखर अधिकारी लगायत स्थानिय व्यापारीहरुको उल्लेख्य सहभागिता रहेको थियो ।
