अर्घाखाँची । नेपाली कांग्रेस अर्घाखाँचीका प्रतिनिधि सभा सदस्य पदका उम्मेदवार बिष्णु प्रसाद खनाल “मुस्कान” ले आफूलाई विश्वास गरेर मत दिने मतदातालाई निरास नबनाउने प्रतिबद्धता व्यक्त गरेका छन् ।
नेपाली कांग्रेस मालारानी गाउँपालिका समितिले आयोजना गरेको अन्तरक्रिया कार्यक्रमलाई सम्बोधन गर्दै उम्मेदवार मुस्कानले जनताको अपेक्षा र विश्वासलाई सम्मान गर्दै जिम्मेवारीपूर्ण ढंगले काम गर्ने बताएका हुन् । उनले भने, “मलाई मतदान गर्नुस्, तपाईँहरूले ममाथि राख्नुभएको भरोसा मेरो लागि ठूलो जिम्मेवारी हुनेछ । म जनताको विश्वासमाथि कहिल्यै आँच आउन दिनेछैन, र मेरा मतदाताको शिर झुक्न नदिने गरी काम गर्नेछु ।”
कार्यक्रममा उनले आफू सधैं जनताको बीचमा रहेर जिल्लाको विकास, सुशासन र जनजीविकासँग जोडिएका विषयमा प्राथमिकता दिने उल्लेख गरे । मतदाताको सुझाव र आवश्यकतालाई नीतिगत तहसम्म पुर्याएर कार्यान्वयनका लागि पहल गर्ने उनको भनाइ थियो ।
उम्मेदवार मुस्कानले जनतासँग गरेको प्रतिबद्धता व्यवहारमा उतार्ने अठोट व्यक्त गर्दै आसन्न निर्वाचनमा सहयोग र समर्थन गर्न आग्रह समेत गरे ।
