अर्घाखाँची । नेपाली कांग्रेसका प्रतिनिधि सभा सदस्य पदका उम्मेदवार बिष्णु प्रसाद खनाल “मुस्कान” ले कृषकलाई सताइरहेको बाँदर र बँदेलको समस्या समाधानका लागि संसददेखि सरकारसम्म जोडदार आवाज उठाउने प्रतिबद्धता व्यक्त गरेका छन्।
नेपाली कांग्रेस पाणिनिले आयोजना गरेको अन्तरक्रिया तथा भेटघाट कार्यक्रममा बोल्दै उनले भने, “बाँदर र बँदेलका कारण किसानको मेहनत बालुवामा पानी झैं भइरहेको छ। म यस विषयमा स्पष्ट नीति बनाउन र प्रभावकारी समाधान ल्याउन संसदमा सशक्त आवाज उठाउने छु।”
मुस्कानले खेतीयोग्य जमिन बाँझो बस्ने अवस्था सिर्जना हुनु गम्भीर चिन्ताको विषय भएको उल्लेख गर्दै वन्यजन्तु नियन्त्रण, क्षतिपूर्ति व्यवस्था र दीर्घकालीन व्यवस्थापन योजनाको आवश्यकता औंल्याए। “किसानको पसिना सुरक्षित नहुँदा देशको अर्थतन्त्र बलियो हुन सक्दैन,” उनले जोड दिए।
उनका अनुसार स्थानीय तह, प्रदेश र संघीय सरकारबीच समन्वय गरेर व्यवहारिक नीति निर्माण गरिनुपर्ने आवश्यकता छ। उनले प्रभावित क्षेत्रमा प्राविधिक अध्ययन, तारबार, नियन्त्रण कार्यक्रम तथा राहत–क्षतिपूर्ति प्रणाली प्रभावकारी बनाउने पहल गर्ने बताए।
स्थानीय कृषकहरूले वर्षौंदेखि झेल्दै आएको समस्यामा स्पष्ट प्रतिबद्धता व्यक्त गरेको भन्दै मुस्कानप्रति आशा व्यक्त गरेका छन्। चुनावी मैदानमा रहेका मुस्कानले कृषकको उत्पादन र सम्मान जोगाउन आफू दृढ रहेको सन्देश दिएका छन्।
