- अर्घाखाँची जिल्ला निर्वाचन कार्यालयले प्रतिनिधिसभा सदस्य उम्मेदवारहरूलाई खर्च विवरण पेश गर्न निर्देशन दिएको छ।
- फागुन २२ गते सम्पन्न निर्वाचनको परिणाम सार्वजनिक भएको ३० दिनभित्र कानुनले तोकेको ढाँचामा खर्च बुझाउनुपर्नेछ।
- उम्मेदवारहरूले खर्च विवरण सार्वजनिक गरी त्यसको प्रमाणसहित कार्यालयमा निवेदन दिन पनि अनुरोध गरिएको छ।
अर्घाखाँची । जिल्ला निर्वाचन कार्यालय अर्घाखाँचीले प्रतिनिधिसभा सदस्य निर्वाचन, २०८२ अन्तर्गत अर्घाखाँची जिल्लाबाट प्रतिस्पर्धा गरेका उम्मेदवारहरूलाई निर्वाचन प्रचार–प्रसार खर्चको विवरण ३० दिनभित्र पेश गर्न निर्देशन दिएको छ।
निर्वाचन कार्यालय एक सूचना जारी गर्दै यही फागुन २२ गते सम्पन्न प्रतिनिधिसभा सदस्य निर्वाचनमा प्रतिस्पर्धा गरेका उम्मेदवारहरूले आफ्नो निर्वाचन प्रचार–प्रसार खर्चको विवरण कानुनले तोकेको ढाँचामा कार्यालयमा बुझाउनुपर्ने जनाएको हो। सूचनाअनुसार प्रतिनिधिसभा सदस्य निर्वाचन निर्देशिका, २०८२ को दफा ८० (२) र (३) बमोजिम उम्मेदवारहरूले निर्वाचन परिणाम सार्वजनिक भएको मितिले ३० दिनभित्र अनुसूची–४२ अनुसारको ढाँचामा खर्च विवरण पेश गर्नुपर्ने व्यवस्था रहेको छ।
त्यसैगरी उम्मेदवारहरूले आफ्नो निर्वाचन खर्च विवरण कुनै माध्यममार्फत सार्वजनिक गरी सोको प्रमाणसहित जिल्ला निर्वाचन कार्यालयमा निवेदन दिन पनि अनुरोध गरिएको छ।
