अर्घाखाँची । हत्या गरेर फरार दुई जना व्यक्तीलाई प्रहरीले १२ वर्ष पक्राउ गरेको छ । अर्घाखाँचीको भूमिकास्थान नगरपालिका वडा नम्बर -१०, धनचौरका दुई जना फरार प्रतिवादी पक्राउ गरी आईतवार सार्वजनिक गरेको हो ।
पक्राउ पर्नेमा भूमिकास्थान-१०, धनचौर प्यारे निवासी ४० बर्षिय शालिकबहादुर बुढा र ३६ वर्षिय नारायण बुढा रहेको जिल्ला प्रहरी कार्यालय अघाखाँचीले जनाएको छ । प्रहरी कार्यालयका प्रमुख डिएसपी मुकुन्द रिजालका अनुसार उनीहरू १२ वर्षदेखी फरार रहेका थिए । गोप्य सूचनाका आधारमा उनीहरूलाई अर्घाखाँची र कपिलवस्तुको सिमानाबाट पक्राउ गरिएको हो ।
उनीहरु विसं २०६७ साल माघ २५ गते सोही ठाउँमा बस्ने ४० वर्षिय दधिराम मुसालको हत्या गरेर फरार थिए। जिल्ला अदालत अर्घाखाँची २०७५ असार ३ गते हत्यामा संलग्न ९ जनालाई २० वर्ष कैदको फैसला सुनाएको थियो । जसमध्ये ६ जनाले कैद मुक्तान गरिरहेका छन् भने हत्यामा संलग्न एक जना अभीयुक्त फरार रहेको प्रहरीले जनाएको छ।
पक्राउ परेका दुई जनालाई अदालतमा पेश गरि प्रक्रिया अगाडी बढाईएको छ ।
