लुम्बिनी साँस्कृतिक नगरपालिकामा बहुप्रतिक्षित र बहुसरोकारित विषयको रुपमा रहेको फोहोरमैला व्यवस्थापनको कार्य सुरु भएको छ ।
बिहिबार नगरपालिकाले मायादेवी मन्दिर प्रवेस गर्ने गेट नम्बर ५ को अगाडिदेखि फोहोर उठाउने र नाली तथा फुटपाथ सफा गर्न सुरु गरेको छ । नगर प्रमुख सजरुद्दिन मुसलमानले आजदेखि फोहोर व्यवस्थापनको कार्य प्रारम्भ भएको र यो कार्य निरन्तर हुने बताएका छन । उनले भने ूनगरपालिका आवश्यक पर्ने स्रोत साधन र जनशक्तिको प्रबन्ध गरेर अगाडि बढ्ने छ ।ू
नगरपालिकाका प्रमुख प्रशासकीय अधिकृत भूपेन्द्र पाण्डेयले फोहोरमैला व्यवस्थापनका लागि तत्कालका लागि सरसफाईकर्मी र नगरपालिका कै टिप्पर परिचालन गरि डम्पिङ गरिने बताएका छन । तर यसले दिर्घकालिन समाधान नदिने भएकाले आधुनिक प्रविधिको प्रयोग गरिने गृहकार्य भईरहेको उल्लेख गरे । उनले चाँडै नै नगरपालिकामा शून्य पोलिथिन तथा घरबाटै कुहिने र नकुहिने फोहोरको वर्गिकरण अभियान चलाइने बताए । सार्वजनिक निजी साझेदारीको अवधारणा अनुरुप कुहिने फोहोरबाट कम्पोष्ट मल बनाउने र नकुहिनेलाई पुनः प्रयोगमा ल्याउन प्लाण्ट स्थापना गरिने उनको भनाई रहेको छ ।
प्रमुख प्रशासकीय अधिकृत पाण्डेय अगाडि थप छन लुम्बिनीको पवित्रता र वुद्धप्रतिको आस्था र विश्वासलाई कायम राख्न लुम्बिनीलाई स्वच्छ, सफा र हरियाली पर्यटकीय नगरीको रुपमा विकास गर्ने योजना रहेको छ । यसका लागि सरोकारवाला सम्पूर्ण नगरवासि, संघ संस्था र नागरिक समाजको सहयोग र सक्रियता आवश्यक रहेको छ । नगरपालिकाका राजनीतिक तथा प्रशासनिक सल्लाहकार मोहम्मद सइद खाँनले आजको सरसफाईको सुरुवातले नगरको सरसफाईमा नयाँ अध्यायको सुरुवात भएको बताए । उनले भने यसले नगरवासीमा नयाँ आशा र उत्साह थपिएको छ ।
वर्षौँदेखि पर्यटन शुल्क उठाउँदै आएको लुम्बिनी विकास कोषले चासो नदिँदा यहाँ फोहोरमैलाको समस्या चुलिएको स्थानीयहरुको भनाई रहेको छ । दैनिक हजारौँ पर्यटक आगमन हुने लुम्बिनीमा यहाँको फोहोर र दुर्गन्धले नकारात्मक सन्देश जाने पर्यटन व्यवसायीहरु बताउँछन ।
