पाेखरा । नेपाली कांग्रेसका महामन्त्री गगन थापाले आफू पार्टी सभापतिबाट अपमानित भएको गुनासो गरेका छन्।पोखरामा भइरहेको नेपाल लिटरेचर फेस्टिभलमा बोल्दै गगन थापाले नयाँ सरकार गठनको विषयमा देउवाले आफूसँग छलफल नै गर्न नचाहेको भन्दै गुनासो गरेका हुन् ।
हिजो आइतवार आफूलाई कति बेला फोन आउँछ भनेर कुरिरहेकाे तर फोन नआएपछि आफू पोखरा आइपुगेको महामन्त्री थापाले बताए । उनले आफूलाई फाेन आउँछ भनेर पाेखरा जाने जहाजकाे टिकट तीन पटकसम्म सारेकाे पनि बताए ।
उनले भने, ‘व्यक्तिगतरूपमा म नढाँटिकन भन्छु, हिजो १० बजे म यहाँ आउने योजना थियो, मैले बिहान ६ बजेदेखि फोन खोलेर पार्टी सभापतिको कल कति बेला आउँछ भनेर कुरेर बसेँ । म अहिले सांसद पनि हो, पार्टीको विधानको हिसाबले पार्टीका महामन्त्री संसदीय दलका पदेन सदस्य हुन्छन्, अहिले दलको नेता शेरबहादुर देउवा हुनुहुन्छ, दुई जना महामन्त्री संसदीय दलको पदेन सदस्य हौँ । मेरो सभापतिले पहिले पार्टीभित्र छलफल गर्ने र त्यसपछि गठबन्धनको बैठकमा अन्तिम निर्णय गर्छु भन्नुभएको कुरा मैले समाचारमा सुनेँ । त्यो पार्टीभित्र त म पनि पर्छु, अनिवार्य पर्छु, पक्कै फोन आउला भन्ने लाग्यो । मलाई हिजो यहाँको सत्र छुट्छ कि भन्ने लागेको थियो तर देश यस्तो मोडमा छ, कम्तीमा पार्टीमा छलफल गरेरमात्रै जानुपर्छ भनेर पोखरा आउने जहाजको टिकट १० बजेबाट १२ बजे, १२ बजेबाट २ बजेका लागि सारेँ । पार्टी कार्यालयमा भएको छलफल होइन, उहाँको निवासमा भएको छलफल हो, घर हो । घरमा नबोलाइनकन जाने कुरा भएन, फोन गरेर बसेको बस्यै गरेँ । एक प्रकारले भन्ने हो भने म यहाँ अपमानित भएको आएको हो । मैले जे महसुस गरेँ त्यो कुरा मैले शेयर गरेको हुँ ।’
