अर्घाखाँची । अर्घाखाँचीको समानुपातिक सांसद बिजुला रायमाझी विरुद्ध अख्तियर दुरुपयोग अनुसन्धान आयोगमा उजुरी परेको छ।
जिल्लाको एक विद्यालयमा सरकारी शिक्षिका रहेर कार्यरत रहेको समयमा शिक्षा नियमावली विपरीत राजनैतिक दलको सदस्यता लिई सक्रिय भई काम गरेको सन्दर्भमा उजुरी परेको हो।
अर्घाखाँची सन्धिखर्क नगरपालिका २ निवासी बिजुला रायमाझी नेकपा एमालेबाट समानुपातिक सांसद हुनु अघिसम्म सोही ठाउँमा रहेको सामुदायिक विद्यालय भगवती माध्यमिक विद्यालय शङ्खटारीमा नेपाली विषयको शिक्षिका थिइन्। शिक्षा नियमावलीले कुनै पनि सरकारी शिक्षकले राजनैतिक दलको सदस्यता लिन नहुने जिकिर गरेको छ ।
निज रायमाझीले सो नियमावलीलाई बेवास्ता गर्दै अध्यापन समयमा नै नेकपा एमालेको जिल्ला कमिटी सदस्य हुँदै एमालेको अखिल नेपाल महिला संघ जिल्ला अध्यक्ष हुँदै केन्द्रीय सदस्यसमेत भएकी थिइन् ।
यो क्रियाकलापले गलत नजिर बसेको भन्दै उनीविरुद्ध अख्तियार दुरूपयोग अनुसन्धान आयोगमा उजुरी दर्ता भएको छ ।
