नेपाल सरकारले यसवर्षको नीति तथा कार्यक्रम प्रस्तुत गरेको छ। निकै सुन्दर र कलात्मक भाषाको सुझबुझपुर्ण प्रयोग गरिएको पूर्ण पाठ विशेष हुँदा हुँदै पनि कार्यक्रमप्रतिको विश्वास जनमानसमा घट्दै गएको छ।
सरकारले नीति तथा कार्यक्रममा समेटेका योजना घोषणाअनुसार कार्यान्वयन गर्न नसक्दा वर्षौँसम्म उही लक्ष्य पूरा गर्ने भन्दै एउटै कार्यक्रम दोहोर्याउने लज्जास्पद अभ्यास हुँदै आएको छ । सामान्य केही पदावली थपघट गरेर एउटै कार्यक्रमलाई पटक पटक नीति तथा कार्यक्रममा समेट्ने गरिएको छ ।
सरकारले हरेक आर्थिक वर्षमा निश्चित कार्यक्रम सम्पन्न गर्ने गरी प्राथमिकताक्रम नै तोकेर नीति तथा कार्यक्रम सार्वजनिक गर्छ । बहुवर्षीय आयोजनाको हकमा पनि एक वर्षभित्र सक्ने काम खुलाएर लक्ष्य तोकेको हुन्छ । यही नीति तथा कार्यक्रमका आधारमा बजेट वक्तव्यमार्फत रकम विनियोजन गरी कार्यान्वयनमा जाने प्रक्रिया हुन्छ । तर, सरकारी नीतिमा समावेश कैयौँ कार्यक्रम वर्षौँसम्म अलपत्र छन् ।
सरकारले ल्याउने कतिपय कार्यक्रमको लक्ष्य नै अमूर्त हुन्छ । कसरी र कहिलेसम्म योजना सम्पन्न गर्ने निश्चित नगरी कार्यक्रम सार्वजनिक गरिएका हुन्छन् । वर्षैपिच्छे समयसीमा फेरेरसमेत पुरानै नीति तथा कार्यक्रम दोहोर्याएका उदाहरण पनि प्रशस्त भेटिन्छन्। नागरिकमा देखिएका नैराश्यहरुलाई बेलैमा सम्बोधन गर्दै आगामी कार्यक्रममा अर्जुनदृष्टि लगाएर अघि बढ्नुमा नै सबैको कल्याण हुनेछ र घोषणाले समेत सार्थकता पाउनेछ ।
