दाङ । आन्तरिक मामिला, कानुन तथा सहकारी मन्त्रालयका सचिव लालबाबू कवारीले मन्त्रालयमा एक हजार बढी योजना मागको चाङ भएको बताएका छन् ।
बुधबार दाङको लमहीमा आयोजित सुशासनका लागि साक्षात्कार कार्यक्रममा बोल्दै सचिव कवारीले यस्तो बताएका हुन् । उनले भने, “बजेट निर्माणको समय मन्त्रालयमा सांसद देखि वडा अध्यक्षसम्मको लाइन छ । मेरो मन्त्रालयमा १ हजार भन्दाबढी योजना मागको चाङ छ, यो सबै सम्बोधन हुन गाह्रो छ, अनि जनता रिसाउछन्, सुशासनको अनुभूति कम गर्छन ।”
सचिव कवारीले ब्यथिती रहित शासन ब्यवस्था ल्याउनु पर्छ भन्ने उदेश्यले सुशासनको अवधारणा आएको बताउदै तिनै तहका सरकार जनमुखी नभइ सुशासन कायम हुन नसक्नेमा जोड दिए । उनले सुशासन महशुस गर्ने कुरा भएको बताउदै सुशासन कायम गर्न सबै निकाय जिम्मेवार हुन जरुरी रहेको बताए ।
जनता नै सर्वोपरि हुन भन्ने हेक्का राखेर इमान्दारीताका साथ काम गर्न सके सुशासन कायम गर्न सहज हुने उनले बताए । प्रदेश सरकारमा पनि बेथिति बढेको भन्दै सबै आफ्नो काम र कर्तव्यप्रति जिम्मेवार तथा उत्तरदायी हुन आवश्यक रहेको उनको भनाइ छ ।
