जहाँ ,
जनताको सर्वोच्चता अनि सम्पन्नता होइन
नेताको सर्वोच्चता अनि सम्पन्नतामा विश्वास गरिन्छ।
अनि भनिन्छ-
देश समृद्धिको बाटोमा लागिसक्यो !
जहाँ ,
एयरपोर्टमा अनि बसपार्कमा
उदासी अनुहारमा
बिदेशिने युवाहरूको भीड हुन्छ ।
अनि भनिन्छ-
देश समृद्धिको बाटोमा लागिसक्यो !
जहाँ ,
बाबु आमाको लासले
विदेशिएका आफ्नै छोराछोरीलाई कुर्नुपर्छ ,
पट्ट्यारलाग्दो ढङ्गले ।
अनि भनिन्छ-
देश समृद्धिको बाटोमा लागिसक्यो !
जहाँ ,
भाषा, धर्म अनि संस्कृतिमाथि ठाडै हस्तक्षेप हुँदा पनि देखिन्छ
नेताहरुमा मौन समर्थन !
अनि भनिन्छ-
देश समृद्धिको बाटोमा लागिसक्यो !
जहाँ ,
अनुपम प्राकृतिक सम्पदाहरुको अवमूल्यन गर्दै
संरक्षणका नाममा व्रम्हलुट मच्चाइन्छ।
लगाइन्छ घाँटी सुक्नेगरी नारा
अनि भनिन्छ-
देश समृद्धिको बाटोमा लागिसक्यो !
जहाँ ,
यावज्जीवेत्सुखं जीवेत् ऋणं कृत्वा घृतं पिबेत् ,
भन्ने चार्वाक् दर्शनलाई
नेताहरूबाटै अनुमोदन गराइन्छ।
अनि भनिन्छ-
देश समृद्धिको बाटोमा लागिसक्यो !
जहाँ ,
जनताहरुले भोकभोकै खुल्ला आकाशलाइ
निरीह बन्दै छानो बनाउदा पनि
रातारात ठडिन्छन्,
नेताहरुका लागि आलिसान महलहरु,
अनि भनिन्छ-
देश समृद्धिको बाटोमा लागिसक्यो !
