एजेन्सी । आईसीसी एकदिवसीय विश्व कप क्रिकेटमा आज दुई वटा खेल हुँदैछन् । बिहान पौने ११ बजे शुरु हुने आजको पहिलो खेलमा अस्ट्रेलिया र न्युजिल्यान्ड खेल्दैछन् ।
पाँच खेलबाट ६ अङ्क जोडेको अस्ट्रेलिया तालिकाको चौथो स्थानमा छ । समान पाँच वटै खेल खेलेको न्युजिल्यान्ड आठ अङ्कसहित तेस्रो स्थानमा छ ।
यस्तै, दिउँसो सवा दुई बजे शुरु हुने आजको दोस्रो खेलमा बङ्लादेश र नेदरल्यान्ड्स खेल्नेछन् ।
बङ्लादेश पाँच खेलबाट २ अङ्कसहित आठौँ र समान पाँच खेलबाट २ अङ्क जोडेको नेदरल्यान्ड्स नेट रनरेटका आधारमा दशौँ स्थानमा छ । हिजो भएको खेलमा पाकिस्तानलाई एक विकेटले पराजित गर्दै दक्षिण अफ्रिका शीर्ष स्थानमा उक्लिएको छ । दक्षिण अफ्रिकाको ६ खेलबाट १० अङ्क भएको छ ।
भारतको पनि समान १० अङ्क छ तर नेट रन रेटको आधारमा दोस्रो स्थानमा झरेको छ । पराजयसँगै पाकिस्तान भने चार अङ्कमै सीमित रह्यो ।
