काठमाडौं । यू–१९ एसिया कप क्रिकेटमा नेपाली टोलीले आइतबार अफगानिस्तानसँग प्रतिस्पर्धा गर्दैछ।
दुबईको आईसीसी एकेडेमी मैदान ‘टू’मा बिहान सवा ११ बजे शुरु हुने खेलमा नेपालले बलियो प्रतिद्वन्द्वी अफगानिस्तानसँग प्रतिस्पर्धा गर्न लागेको हो।
एसिया कपको समूह एमा रहेको नेपाल र अफगानिस्तान दुवै पहिलो जितको खोजीमा मैदान उत्रिँदैछन्। प्रतियोगिताको सेमिफाइनल पुग्ने सम्भावनालाई कायम राख्न आज नेपाल र अफगानिस्तान दुवैलाई जित्नै पर्ने दबाब छ।
नेपालले पहिलो खेलमा पाकिस्तानसँग र अफगानिस्तानले भारतसँग समान ७ विकटको हार व्यहोरेका थिए। १९ वर्षमुनिको टोलीको ‘हेड टू हेड’ हेर्ने हो भने अफगानिस्तानले पछिल्ला ५ वटै खेलमा नेपालविरुद्ध प्रभावशाली जित निकालेको छ।
यस्तै बिहान सवा ११ बजे नै शुरु हुने अर्को खेलमा समूह ए का भारत र पाकिस्तानबीच प्रतिस्पर्धा हुँदैछ। दुवै टोली आज लगातार दोस्रो जितको लक्ष्यमा मैदान उत्रिने छन्।
