सन्धिखर्क । प्रधानमन्त्री पुष्पकमल दाहाल प्रचण्डद्वारा समुद्घाटन हुने अर्घाखाँची पर्यटन प्रबर्द्धन २०८० को लागि अर्घाखाँचीको सदरमुकाम सन्धिखर्कमा निर्देशक समितिको बैठक सम्पन्न भएको छ ।
“आर्थिक विकास, पर्यटन प्रबर्द्धन, स्थानीय रोजगारीका लागि अर्घाखाँची पर्यटन प्रबर्द्धन कार्यक्रम – २०८०“ अभियानले अर्घाखाँचीका धार्मिक, ऐतिहासिक र पर्यटकीय स्थलहरूको प्रचार प्रसार र प्रबर्द्धन गर्नेछ । नेपाल पत्रकार महासंघ अर्घाखाँचीले आयोजना गरेको उक्त कार्यक्रम माघ १ गते सन्धिखर्कको टुँडिखेलमा उद्घाटन गरी शुभारम्भ गरिनेछ ।
कार्यक्रमलाई सम्पन्न गर्नको लागि जिल्ला समन्वय समिति अर्घाखाँचीका प्रमुख तथा कार्यक्रमका निर्देशक जीवनारायण कोइरालाको संयोजकत्वमा ५ सदस्यीय कार्यक्रम व्यवस्थापन समितिको चयन समेत गरिएको छ । जसमा सन्धिखर्क नगरपालिकाका नगर प्रमुख कृष्ण प्रसाद श्रेष्ठ, प्रमुख जिल्ला अधिकारी कमलराज ढकाल, पत्रकार महासङ्घका अध्यक्ष अशोक खनाल, अभियानका प्रवक्ता हृदयकुमार भुसाल रहेका छन् ।
बैठकमा ६ वटै स्थानीय तहका प्रमुख, जिल्ला स्थित राजनीतिक दलका प्रमुख, प्रमुख जिल्ला अधिकारी लगायत सुरक्षा निकायका प्रमुख र पत्रकारहरूको उपस्थिति रहेको थियो । बैठकले कार्यक्रम उद्घाटन पूर्वको विभिन्न कार्यक्रमहरूको तयारी समेत गरेको छ । जसमा पुस २७ गते पर्यटन प्रबर्द्धन सम्बन्धी निर्माण गरिएको गीतको शुभारम्भ, २८ गते बिहान प्रभात फेरी, २९ गते बिहान सरसफाइ सोही दिन दिउसो २ बजे मोटरसाइकल र्याली र साँझ दीप प्रज्वलन गर्ने समेत बैठकले निर्णय गरेको प्रवक्ता हृदयकुमार भुसालले जानकारी दिए ।
पर्यटन प्रबर्द्धन अभियान सम्पन्न गर्न र गराउन सबै पक्षलाई पत्रकार महासङ्घका अध्यक्ष अशोककुमार खनालले अनुरोध गरे ।
