अर्घाखाँची । कार्यक्रममा सभामुख घर्तीले स्थानीय सरकारका प्रमुख/उपप्रमुखलाई कर्मचारीले सञ्चालन गरेको बताएका छन् ।
कानुन निर्माण तथा सभा सञ्चालन सम्बन्धी सन्धिखर्कमा आयोजित अन्तरक्रिया कार्यक्रममा सभामुख घर्तीले यस्तो बताएका हुन् । स्थानीय सरकारका प्रमुख तथा उपप्रमुखले आफ्नो कर्तव्य तथा जिम्मेवारी बोध गर्न नसकेको प्रति चिन्ता व्यक्त गर्दै स्थानीय सरकार व्यवस्थापिका र कार्यपालिका स्वयं आफै भएकाले कर्मचारी परिचालन गर्न सक्नुपर्ने बताए ।
सभामुख घर्तीले प्रदेश सरकार र स्थानीय सरकारको अन्योन्याश्रित सम्बन्ध रहेको समेत जिकिर गर्दै कानुन निर्माणकाे सवालमा सहकार्य गर्न अनुराेध समेत गरेका छन् । स्थानीय सरकारले विकास निर्माणमा मात्र जोड दिएको पाइएकाले कानुन निर्माणबिना विकास निर्माण गर्दा अप्ठ्यारो हुने भएकाले विकाससँगै कानुन निर्माणमा समेत ध्यान दिनुपर्नेमा सभामुख घर्तिले जोड दिए ।
उनले लुम्बिनी प्रदेशले हालसम्म ७६ वटा कानुन निर्माण गरिसकेको बताउँदै स्थानीय निजामती सेवा ऐन अध्यादेशबाट भएपनि छिटै ल्याउन लागिएको बताए ।
