अर्घाखाँची । गाउँघरमा पाहुनालाई पाहुरको रूपमा प्रयोग हुँदै आएको सुन्तला यतिबेला व्यावसायिक अभ्याससँगै आयआर्जनको मुख्य स्रोत बनेको छ । सुन्तलाको व्यावसायिक खेतीसँगै अर्घाखाँचीको पाणिनि गाउँपालिका वडा नम्बर २ पोखराथोकका किसानहरु सुन्तलाको जुस बनाउन सक्रिय भएका छन् ।
सुन्तलालाई खेर जान नदिन, कृषकलाई आयआर्जनमा थप टेवा दिन र व्यावसायिकरूपमा सक्षम बनाउन किसानलाई जुस बनाउने तालिम दिइएको घरेलु तथा साना उद्योग कार्यालय अर्घाखाँचीका प्रमुख सन्तोष खनालले बताए । ‘ साना सुन्तला जुन बिक्री हुँदैनन्, ग्राहकले किन्न मन पराउँदैनन्, त्यस्ता साना सुन्तलाको जुस बनाउँदा राम्रो सदुपयोग हुने अनुभव गरियो । सोहीअनुसार कृषकसँग हाम्रो सहकार्य जारी छ ।’ खनालले भने ।
केही वर्षअघि सडक सञ्जाल नहुँदा डोकोमा बोकेर बजारसम्म सुन्तला ल्याउने कृषक अहिले यातायातका साधन गाउँगाउँमा पुगेसँगै सुन्तला राखेर ढुवानी गरी देशका विभिन्न ठाउँमा पुर्याउन थालेका छन् । सबै ग्राहकका आँखा लाग्ने ठूला सुन्तला बिक्री वितरण भए पनि कम आँखा लाग्ने साना सुन्तलाबाट जुस बनाउने कामसमेत शुरु गरिएको छ ।
पाणिनि गाउँपालिका वडा नम्बर १ र २ का अगुवा कृषकको भेला गराइ सुन्तलाबाट जुस निकाल्न तालिम दिन शुरु गरिएको र कृषकलाई नयाँ सीप, उपकरणसमेत हस्तान्तरण गरिरहेको घरेलु कार्यालयका प्रमुख खनालको भनाई छ ।
अर्घाखाँचीमा पाणिनि गाउँपालिकामा सबैभन्दा बढी सुन्तला खेती हुँदै आएको छ । यहाँका किसानले वार्षिक १० करोड रुपैयाँको सुन्तला बिक्री वितरण गर्ने गरेका छन् । सुन्तलाको जुस बनाउन अगुवा कृषकलाई तालिम दिइएपछि किसानहरु हर्षित भएका छन् ।
तालिमबाट सिकेको सीप गाउँमा एक कृषकबाट अन्य कृषकले पनि सिक्ने भएका कारण तालिमको आयोजना गरिएको घरेलु कार्यालय अर्घाखाँचीका अधिकृत लक्ष्मी प्रसाद दाहालले जानकारी गराए ।
दुई वडाका २० जना अगुवा कृषकले पहिलोपटक जुस बनाउने तालिम सिक्न शुरु गरेको दाहालले बताए । अब सुन्तलाको जुस बनाउने जुसन मेसिन अन्य पालिकामा उपलब्ध गराउने लक्ष्य लिइएको कार्यालयका प्रमुख खनालको भनाइ रहेको छ ।
अर्घाखाँचीको सुन्तला विभिन्न जिल्ला, मेला र हाटबजारमा जाने गरेको र सुन्तला बिक्री वितरणबाट राम्रो आम्दानी हुने गरेको अगुवा कृषक प्रमोद गौतमले जानकारी दिए ।
गौतमले सुन्तलाको जुस बनाएर सबैको हातमा जुस पुर्याउने अभियानमा लागेको बताउँदै यसले गाउँमा किसानहरुको मनोबल बढेकाले आयआर्जमा पनि वृद्धि हुने अपेक्षा रहेको बताए ।
