अर्घाखाँची । संस्कृति पर्यटन तथा नागरिक उड्डयन राज्यमन्त्री सुशीला श्रीपालीले परिवर्तन ल्याउन सहिदको महत्वपूर्ण भूमिका रहेकाेले सहिदका सपना पूरा गर्न सबैले हातेमालो गरेर अगाडि बढ्नुपर्नेमा जोड दिइन् ।
सन्धिखर्क नगरपालिकाको वडा नम्बर ९ अर्घामा आज ऐतिहासिक सहिद स्मृतिको उद्घाटन गर्दै मन्त्री श्रीपालीले यस्तो बताएकी हुन् । उनले जीवनपर्यन्त आफ्नो सम्पूर्ण तागत देश र जनताको हितका खातिर समर्पित सम्पूर्ण सहिदहरू प्रति सम्मान व्यक्त गर्दै सहिदहरूले देखाएको बाटोमा लामबद्ध भइ त्याग र प्रेरणालाइ राष्ट्र र जनताको विकास एवं समृद्धिका लागि खर्चिने सङ्कल्प गर्नुपर्ने बताइन् ।
मन्त्री श्रीपालीले सङ्घीय लोकतान्त्रिक गणतन्त्रलाई संस्थागत गर्न तथा नयाँ संविधानको कार्यान्वयन मार्फत देशलाई समृद्ध र समुन्नत बनाउन सहिदहरूको सपना तथा योगदान सधैँ प्रेरणादायी हुने विश्वास व्यक्त गर्दै नेपालको परिवर्तित आन्दोलनमा सहादत प्राप्त गर्ने सम्पूर्ण सहिदको ठुलो योगदानलाई कसैले मेट्न नसक्ने बताइन्र । सहिद सबैका साझा हुने बताउँदै मन्त्री श्रीपालीले विकास समृद्धिमा सबै एकजुट भई मुलुकको दिगो विकासका लागि सबै लाग्नुपर्ने बताइन् ।
कार्यक्रममा सन्धिखर्क नगरपालिका उपप्रमुख मिश्रा आचार्य, सन्धिखर्क नगरपालिकाका संस्थापक नगर उपप्रमुख ठाकुर कुमार बिक किशोर, लगायतका वक्ताले कार्यक्रममा मन्तव्य राख्दै वर्तमान व्यवस्था ल्याउन सहिदको महत्वपूर्ण भूमिका रहेको बताएका थिए ।
निर्माणको जिम्मा हिमान्जय कन्स्ट्रक्सन प्रालिले लिएको इन्जिनियर बिरेन्द्र चौधरीले बताएका छन् । पर्यटन विभागले अर्घाखाँचीका विभिन्न ५ स्थानमा यस्ता कामलाई निरन्तरता दिएको उनले बताएका छन् । वडा न ९ का अध्यक्ष पदम बहादुर भुसालको अध्यक्षता, सचिव अनन्तमणि पोख्रेलको सञ्चालन, वडा सदस्य देवी खड्काको स्वागत मन्तव्यमा सम्पन्न कार्यक्रममा विभिन्न राजनैतिक दल, समाजसेवी सहिद परिवार सञ्चारकर्मी लगायतको उपस्थिति रहेको थियो ।
