अर्घाखाँची । अर्घाखाँचीमा एक दिने वृहत निःशुल्क स्वास्थ्य शिविर सञ्चालन हुने भएको छ ।
शनिवार सन्धिखर्क नगरपालिका वडा नं.२ बेलबाटीका अर्घाखाँची आवासीय माध्यमिक विद्यालयको प्राङ्गणमा शिविर सञ्चालन हुने भएको हो । सन्धिखर्क नगरपालिका र सुशील कोइराला स्मृति प्रतिष्ठान काठमाडौंको आयोजनामा हुने एक दिने निःशुल्क स्वास्थ्य शिविरमा काठमाडौं मेडिकल कलेजले प्राविधिक सहयोग गर्ने भएको सन्धिखर्क नगरपालिकाले जनाएको छ ।
अर्घाखाँची जिल्लाभरका बिरामीहरू शिविरमा आएर उपचार गर्न सक्ने सन्धिखर्क नगरपालिकाका प्रमुख कृष्णप्रसाद श्रेष्ठले जानकारी दिए । श्रेष्ठले १९ गते दिउँसो ३ बजेसम्म नाम दर्ता गर्न सक्ने पनि बताएका हुन । “शनिबार बिहान १० बजेदेखि शिविर सञ्चालन हुँदैछ, दिउँसो ३ बजेसम्म नाम दर्ता गर्नुपर्ने छ” उनले भने “शिविरमा १२ जना विशेषज्ञ डाक्टरहरू आउँदै हुनुहुन्छ ।”
शिविरमा जनरल मेडिकल, स्त्रीरोग, बाल रोग, शल्यक्रिया सर्जरी, मानसिक तथा नशा रोग, हार्ड जोर्नी तथा नशा, छाला तथा यौन रोग, नाक कान घाँटी रोग, आँखा रोग, दन्त रोग, मुटु रोग, ई.सि.जि, भिडियो एक्सरे, ल्याब सेवा, मुटुको जाँच लगायतका विशेषज्ञ सेवाहरू सञ्चालन हुनेछन् । शिविरमा फार्मेसी सेवा पनि दिइने छ ।
पैसा नभएर उपचार गर्न नसेका बिरामीहरूको आवश्यकतालाई मध्यनजर गर्दै निःशुल्क स्वास्थ्य शिविर सञ्चालन गरेको प्रमुख श्रेष्ठले बताए ।
