अर्घाखाँची । निर्वाचन कार्यालय अर्घाखाँचीले मतदाता नामावलीमा रहेको त्रुटि सच्याउन एक हप्ताको समय दिएको छ ।
फागुन २९ गतेदेखि चैत ५ गतेसम्म मतदाता नामावलीमा रहेको त्रुटि सच्याउन निवेदन दिने, कसैले झुट्टा विवरण दिई नामावलीमा नाम समावेश गरेको भएको विरोधमा उजुरी दिने समय दिएको निर्वाचन कार्यालय अर्घाखाँचीका जिल्ला निर्वाचन अधिकारी मधुकृष्ण पौड्यालले बताए।
मतदाताले त्रुटि सच्याउनका लागि आयोगको अनलाइन एप्लिकेशन, निर्वाचन कार्यालय वा पालिकाका वडा कार्यालयमा निवेदन दिन सकिने पौड्यालले जानकारी दिए ।
त्यस्तै उक्त समय भित्रै कुनै व्यक्तिको एकभन्दा बढी स्थानमा नामावली समावेश भए एक स्थानमा मात्र कायम गर्न निवेदन दिने, मतदाता नामावलीमा मृत्यु भएका वा नागरिकता त्याग गरेका व्यक्तिको नाम हटाउन सूचना दिनुपर्ने छ।
यनिै सूचनाको आधारमा चैत ६ देखि ८ गतेसम्म उजुरी परेको मतदातालाई प्रमाणसहित सफाइको मौका दिने, चैत ९ देखि १२ गतेसम्म नामावलीबाट हटाउने सम्बन्धमा आवश्यक छानबिन गरी प्रमुख नाम दर्ता अधिकारीले त्रुटि सच्याउने, नाम हटाउने लगायतका काम गर्ने छन्।
यसरी नाम हटाइएको सूचना चैत १२ देखि १५ गते भित्र निर्वाचन र वडा कार्यालयमा प्रकाशन गर्ने र फरक–फरक जिल्लामा दोहोरो नाम परेको निवेदन प्राप्त भए सोको छुट्टै विवरण तयार गरी जिल्लामा अद्यावधिक भएको डाटासँगै आयोग पठाउने र चैत २२ गते आयोगले अन्तिम मतदाता नामावली प्रकाशन गर्ने तयारी गरेको पौड्यनलले बताए।
