अर्घाखाँची । जिल्लाकाे भुमिकास्थान नगरपालिकाका मेयर झविलाल थापाले आफ्नो कार्यालयको लेटरप्याड, छाप र हस्ताक्षर किर्ते गरेको आरोप लगाएका छन् ।
उनले नगरपालिकाको लेटरप्याड, छाप र हस्ताक्षर किर्ते गरी चुनढुङ्गाको उत्खनन् अनुमती लिईएको आरोप लगाएका हुन् । सोमबार नगरपालिकामा पत्रकार सम्मेलन गर्दै मेयर थापाले भुमिकास्थान नगरपालिका वडा नम्बर ९, ढिकुराको सान्डेभामा रहेको चुनढुङ्गा उत्खनन्को लागि अनुमति दिएको भनि भूगर्भ बिभागमा पुगेको नगरको पत्र किर्ते रहेको बाताए । उनले कार्यालयबाट लेटरप्याड, छाप र हस्ताक्षर चोरी भएको भन्दै मेयर थापाले यो गम्भिर अपराध भएकोले यस विरुद्ध कानुनी प्रकृयामा जाने जिकिर समेत गरे ।
कपिलवस्तुको कृष्णनगरमा रहेको विजया सिमेन्ट्स प्रालीले २०८० फागुन १४ गते खानी तथा भूगर्भ विभागबाट चुनढुङ्गा उत्खनन्को अनुमती–पत्र पाएको थियो । मंसिर ५ गते नगरप्रमुख थापाको हस्ताक्षर सहितको पत्र विभागलाई गएको छ । सोही पत्रका आधारमा भूगर्भ बिभागले काम गर्न अनुमति दिएको थियो । तर, नगरप्रमुखले यसलाई किर्ते भएको अभिव्यक्ती दिएका छन् ।
मेयर थापाले भने “खानी तथा भूगर्भ विभागलाई नगरले सिफारिश गरी पठाएको पत्रमा दर्ता÷चलानी नं. ५८५ छ । यता नगरपालिकाको दर्ता÷चलानी किताबमा ५८५ नम्बरमा संघिय खानेपानी तथा सरसफाई डिभिजन कार्यालयलाई पठाएको पत्र छ । त्यसैले यो किर्ते गरीएको हो । मैले खानी उत्खनन् गर्न अनुमती दिनेगरी पत्र पठाएको छैन । हाम्रो कार्यपालिकाको निर्णय पनि त्यो होईन ।”
यता विजया सिमेन्ट्स नवाफ अलीले आफुहरु पर्ख र हेरको स्थितीमा रहेको समाचारपोष्टलाई जानकारी दिए । “सत्य तथ्य बाहीर आउनुपर्छ ।” उनले भने, “हामी व्यवसायी हाैँ, लगानी गर्ने हो परामर्शमा छौँ।”
