अर्घाखाँची । सामाजिक न्यायको सुदृढीकरणका लागि महिला राजनीतिककर्मीहरुको भूमिका विषयक कार्यशाला गोष्ठी सन्धिखर्कमा सम्पन्न भएको छ ।
नेपाल दलित उत्थान संघको आयोजना र एफइएस नेपालको सहयोगमा सम्पन्न भएको कार्यशालामा सन्धिखर्क नगरपालिका, भुमिकास्थान नगरपालिका, छत्रदेव गाउँपालिका र मालारानी गाउँपालिकाका दलित जनप्रतिनिधि, र महिला राजनीतिक कर्मीहरुको सहभागीता रहेको थियो ।
कार्यक्रमको उद्घाटन गर्दै सन्धिखर्क नगरपालिकाका नगर उपप्रमुख मिश्रा आचार्यले महिलाहरुलाई तीनै तहका सरकारमा सम्मानजनक उपस्थिति गराउन सबै निकाय लाग्नु पर्ने बताईन । राजनीतिक दलहरूले महिला आरक्षण सिटमा संवैधानिक बाध्यताका कारण टिकट दिएपनि खुला सिटमा टिकट दिन आनाकानी गरेको आरोप लगाईन ।
कार्यक्रमको उद्घाटन समारोहमा एफइएस नेपालका आवशीय प्रतिनिधि नटलिया फिगे, दलित अगुवा तथा युवा नेताहरु लिलबहादुर बिक, विष्णु परियार, नेपाल पत्रकार महासंघका लुम्बिनी प्रदेश सदस्य प्रेमनारायण आचार्य लगायतले मन्तव्य राखेका थिए । कार्यक्रममा अधिवक्ताहरु पवित्रा राउत र सुस्मा गौतमले प्रशिक्षण दिएका थिए ।
कार्यक्रम नेपाल दलित उत्थान संघका अध्यक्ष कमल विकको अध्यक्षता, सीता सिर्पालीको सञ्चालन र शिला विकको स्वागत मन्तव्यमा सम्पन्न भएको हो ।
