काठमाडौं । राष्ट्रिय लोक भजन चुट्का संस्कृति संरक्षण प्रतिष्ठान नेपाल, बाग्मती प्रदेश कमिटिका महासचिव टेकराज पोखरेलले नयाँ धार्मिक लोकभजन ‘बन्सुरी हरायो मेरो’ सार्वजनिक गरेका छन् । यसअघि ‘नवदुर्गा भवानी भजन’ सार्वजनिक गरेका पोखरेलले यसपटक पिता–पुर्खादेखि गाइँदै आएको कृष्णलीलाको प्रसङ्गमा आधारित भजन दर्शक–श्रोतामाझ ल्याएका हुन् ।
भजनलाई पोखरेलले आफ्नै ‘गोपाल सिद्ध भजन सङ्ग्रह’ पुस्तकबाट संकलन गरेका हुन् । यसमा टेकराज पोखरेल, रबिन्द्र पोखरेल, हरि प्रसाद पोखरेल, सरु न्यौपाने पोखरेल, कौसिला पोखरेल र भक्तिराम पोखरेलले स्वर र लय दिएका छन् ।
प्रमिता पोखरेलको नृत्य निर्देशनमा तयार गरिएको भिडियोमा प्रमिता, शिल्पा, एलिसा, ममता र सम्झनाको आकर्षक नृत्यले भजनलाई झनै मनोरञ्जनपूर्ण र प्रभावशाली बनाएको छ । भजनलाई कोहिनुर मिडिया प्रालि को अफिसियल युट्युब च्यानल मार्फत सार्वजनिक गरिएको हो ।
पोखरेलकाअनुसार ‘बाँसुरी हरायो मेरो’ उनको छैठौं सिर्जना हो । उनले आगामी दिनमा पनि धार्मिक र सांस्कृतिक भजनको रचना, निर्माण र प्रसारणमा निरन्तर क्रियाशील रहने प्रतिबद्धता जनाएका छन् ।
उनका अनुसार अर्घाखाँची, पाल्पा, गुल्मी, प्युठान, स्याङ्जा लगायतका पहाडी जिल्लाहरू र नवलपरासी, रुपन्देही, कपिलवस्तुजस्ता तराईका क्षेत्रमा यस्ता लोकभजन गाउने परम्परा अझै जीवित छ । उनले उक्त परम्परालाई आधुनिक माध्यममार्फत नयाँ पुस्तासम्म पुर्याउने लक्ष्य लिएका छन् ।
भजनले कृष्णलीलाको प्रेमील प्रसङ्गमार्फत प्रेमी–प्रेमिकाबीचको साँचो प्रेमको सन्देश दिनका साथै नेपाली समाजमा रहेको धार्मिक आस्था, लोकपरम्परा र संस्कृतिप्रतिको श्रद्धा बलियो बनाउने उद्देश्य लिएको छ ।
