- कपिलवस्तुमा चार युवा उद्यमीको सक्रियतामा होन्डा शोरुम र कङ्क्रिट ब्लक उद्योग सञ्चालनमा आएका छन्।
- लुम्बिनी प्रदेशका मन्त्री भण्डारीलाल अहिरले यी उद्योगको उद्घाटन गर्दै रोजगारी र आर्थिक वृद्धिमा टेवा पुग्ने विश्वास व्यक्त गरे।
- सोही अवसरमा मन्त्री अहिरले तौलिहवा यातायात कार्यालयको निरीक्षण गर्दै सवारी चालक अनुमतिपत्र सेवा छिटो सुरु गर्ने प्रतिबद्धता जनाए।
कपिलवस्तु । कपिलवस्तुका चार युवा उद्यमीको संयुक्त पहलमा नयाँ व्यवसाय तथा उद्योग सञ्चालनमा आएका छन्। कपिलवस्तु नगरपालिका–१ नयाटोलमा नेपाल श्री ट्रेडर्सको आधिकारिक होन्डा मोटरसाइकल शोरुम तथा वडा नं. ६ गौबरीमा कपिलवस्तु कङ्क्रिट ब्लक उद्योग सञ्चालनमा आएको हो।
लुम्बिनी प्रदेश सरकारका आन्तरिक मामिला, कानुन, उद्योग तथा यातायात मन्त्री भण्डारीलाल अहिरले दुवै संस्थाको रिबन काटेर उद्घाटन गरेका हुन्।
उद्घाटन कार्यक्रममा मन्त्री अहिरले स्थानीयस्तरमै उद्योग तथा व्यवसाय सञ्चालन हुनु सकारात्मक रहेको बताउँदै यस्ता उद्यमले आर्थिक गतिविधि बढाउनुका साथै रोजगारी र व्यवसायिक अवसर सिर्जना गर्न योगदान पुर्याउने धारणा व्यक्त गरे।
नेपाल श्री ट्रेडर्सबाट होन्डाका विभिन्न मोडलका मोटरसाइकल तथा स्कुटरसँगै स्पेयर पार्ट्स र सर्भिसिङ सेवा समेत उपलब्ध हुने सञ्चालकले जानकारी दिएका छन्। यसबाट कपिलवस्तुका ग्राहकले जिल्लामै होन्डाका सवारीसाधन तथा सम्बन्धित सेवा सहज रूपमा प्राप्त गर्न सक्ने अपेक्षा गरिएको छ।
नेपाल श्री ट्रेडर्समा अनुपकुमार पाण्डे, देवेश जैसवाल, रत्नाकर शुक्ला र इश्तेखार अहमद खान गरी चार जना युवा व्यवसायी साझेदार रहेका छन्।
त्यस्तै, कपिलवस्तु नगरपालिका–६ गौबरीमा सञ्चालनमा आएको कपिलवस्तु कङ्क्रिट ब्लक उद्योगले विभिन्न प्रकारका निर्माण सामग्री उत्पादन गर्ने जनाएको छ। उद्योगबाट इन्टरलक इँटा, मिलेट इँटा, जिगज्याग इँटा, युनिटी पेभर इँटालगायतका कङ्क्रिटजन्य निर्माण सामग्री उत्पादन हुने बताइएको छ।
यसैबीच, मन्त्री अहिरले तौलिहवास्थित यातायात कार्यालयको समेत निरीक्षण गरेका थिए। सो क्रममा स्थानीय जनप्रतिनिधिले कपिलवस्तुमा ट्रायलसहितको सवारी चालक अनुमतिपत्र सेवा सञ्चालन तथा नयाँ लाइसेन्स वितरणसम्बन्धी सेवा जिल्लामै प्रभावकारी रूपमा उपलब्ध गराउन माग गरेका थिए।
मन्त्री अहिरले यातायात कार्यालयमा ट्रायल परीक्षा सञ्चालन तथा नयाँ सवारी चालक अनुमतिपत्र वितरणसम्बन्धी सेवा छिटोभन्दा छिटो उपलब्ध गराउन आवश्यक पहल गर्ने प्रतिबद्धता जनाएका छन्।
होन्डाका लुम्बिनी रिजनल म्यानेजर राजाराम खन्नासहित स्थानीय व्यवसायी तथा सरोकारवालाको उपस्थितिमा भएको उद्घाटन कार्यक्रमले कपिलवस्तुमा युवा उद्यमशीलता, स्थानीय लगानी र व्यवसायिक गतिविधि विस्तारतर्फ नयाँ सम्भावना थपिएको देखाएको छ।
