- कपिलवस्तु नगरपालिकाले भोटेकोशी बाढी पीडितका लागि प्रधानमन्त्री दैवी प्रकोप उद्धार कोषमा ५१ लाख ११ हजार रुपैयाँ सहयोग गर्ने निर्णय गरेको छ।
- यस सहयोगमा नगरका जनप्रतिनिधि, कर्मचारी र शिक्षकहरूको योगदान रहेको छ भने नगर प्रमुखले आफ्नो एक महिनाको तलब समेत प्रदान गर्नुभएको छ।
- नगरपालिकाले विपद्मा परेका नागरिकलाई सहयोग गर्न अन्य संघ-संस्था र नगरवासीलाई समेत अपिल गरेको छ।
कपिलवस्तु । भोटेकोशी नदीमा आएको भीषण बाढीबाट प्रभावित नागरिकहरूको राहत, उद्धार तथा पुनःस्थापनाका लागि कपिलवस्तु नगरपालिकाले प्रधानमन्त्री दैवी प्रकोप उद्धार कोषमा रु. ५१ लाख ११ हजार सहयोग गर्ने निर्णय गरेको छ।
नगर कार्यपालिकाको बैठकले उक्त रकम एकमुष्ट रूपमा कोषमा जम्मा गर्ने निर्णय गरेको हो। नगरपालिकाका अनुसार उक्त सहयोगमा जनप्रतिनिधि, कर्मचारी तथा शिक्षकहरूको समेत योगदान समेटिएको छ।
यस मानवीय अभियानमा नगर प्रमुख सुदीप पौडेलले आफ्नो एक महिनाको तलबसमेत सहयोग गर्ने घोषणा गर्नुभएको छ।
विपत्तिको समयमा जनप्रतिनिधि, कर्मचारी तथा शिक्षकहरूको सामूहिक योगदानले बाढी प्रभावित नागरिकप्रति स्थानीय सरकारको जिम्मेवारी र मानवीय संवेदनालाई थप उजागर गरेको नगरपालिकाले जनाएको छ।
उपलब्ध विवरणअनुसार, हालसम्म १० वटा स्थानीय तहमध्ये कपिलवस्तु नगरपालिकाले घोषणा गरेको रु. ५१ लाख ११ हजार सहयोग उच्च योगदानमध्ये एक रहेको जनाइएको छ।
नगरपालिकाले प्राकृतिक विपत्तिमा परेका नागरिकहरूको राहत, उद्धार तथा पुनःस्थापनाका लागि सहयोग र सहकार्य गर्न नगरवासी, संघ–संस्था तथा सहयोगी मनहरूलाई समेत अपिल गरेको छ।
“विपत्तिमा सहयोगको हात बढाऔँ, मानवताको धर्म निभाऔँ।”
