अर्घाखाँची । लामो समय देखि फोक्सोको क्यान्सरसङ्ग लडिरहेका सन्धिखर्क १० बेल्टारी घर भइ हाल सन्धिखर्क ०२ घोचाखोला निवासी प्रेम थापाको उपचारका लागि लायन्स क्लब अफ अर्घाखाँचीले आर्थिक सहयोग गरेको छ ।
क्लवका अध्यक्ष प्रकाश परियारको जन्म दिनको अवसरमा क्लबबाट ४३ हजार ९० रुपैया आर्थिक सहयोग प्रदान गरेको क्लवका सचिव प्रदिप आचार्यले बताएका छन् । लामो समय देखि बिरामी भएका प्रेम थापाको उपचारमा आर्थिक समस्या भएपछि क्लवले सहयोग गरेको हो ।
जन्मदिन मनाउनको लागि गरिने फजुल खर्च नगरी बिरामी लाई उपचारका लागि बिरामीको घरमै पुगि स्वास्थ लाभको कामना र आर्थिक सहयोग गरिएको लायन्स क्लब अफ अर्घाखाँचीका अध्यक्ष प्रकाश परियारले बताएका छन् । सन्धिखर्क नगरपालिकाको स्वास्थ शाखामा जनस्वास्थ निरीक्षकको रुपमा समेत कार्यरत छन् ।
सन्धिखर्कमा इलेक्ट्रिक व्यवसाय गर्दै आएका प्रेम थापा साढे २ वर्ष अघि फोक्सोको क्यान्सरबाट ग्रसित भएपछि उनको उपचारका लाखौं धनराशी खर्च भइसकेको छ । भएको धनसम्पत्ति उपचारमा खर्च भएपछि अहिले उनको उपचारमा समेत आर्थिक समस्या उत्पन्न भएको छ ।
उपचारका लागि सबैले सहयोग गरेर आफुलाई बचाइदिन पिडित थापाले सार्वजनिक रुपमा अपिल गरेका छन । थापाको २ छोरी, साढे दुइ बर्षिय एक छोरा र श्रीमती रहेकाछन । अहिले आर्थिक अभावमा नियमित उपचार समेत प्रभावित भएको र आफु तलमाथि भए परिवारको विचल्ली हुने भन्दै पिडित प्रेमले आफ्नो ज्यान बचाइदिन सबैसंग याचना गरे ।
लायन्स क्लब अफ अर्घाखाँचीले अर्घाखाँचीमा रहेर विभिन्न सामाजिक गतिविधि हरु रक्तदान, बृक्षारोपण, राहत बितरण जस्ता कार्यहरु गर्दै आईरहेको छ । दुखी पीडित हरुको लागि विभिन्न समयमा सहयोग संगै सामाजिक उत्तरदायित्व बहन गर्दै आईरहेको क्लबका जोन चेयर प्रसन हरि प्रसाद भुसालले बताए । जिल्लामा रहेर विभिन्न पेशा ब्यबसायमा आवद्ध सदस्यहरुको सस्था लायन्स कल्वले सामाजिक अभियानहरु संचालन गर्दै आईरहेको छ ।
