अर्घाखाँची । अर्घाखाँचीको चुत्राबेँसीमा अवैध अनधिकृत रुपमा कृषि सहकारीको मल बिक्री गर्न लुकाइ राखेको साँढे ३४ बोरा डिएपी मल घरेलु तथा साना उद्योगको आयोजनामा गरिएको जिल्ला संयुक्त अनुगमन टोलीले नियन्त्रणमा लिएको छ ।
अर्घाखाँची सन्धिखर्क –२ चुत्राबेँसीको भुसाल एग्रोभेटबाट साढे १७ बोरा र बन्जाडे एग्रोभेटबाट १७ बोरा गरी जम्मा साँढे ३४ बोरा डिएपी मल अवैध हिसाबले लुकी चोरी गरी बेच्ने र अवैध नाफा कुम्लाउने तवरले अनधिकृत रुपमा ,बिक्री गर्ने गरेको र लुकाइ राखेको अवस्थामा जिल्ला प्रशासन कार्यालय , सन्धिखर्क नगरपालिका , कृषि ज्ञान केन्द्र , जिल्ला प्रहरी कार्यालय , घरेलु तथा साना उद्योग , कोष तथा लेखा नियन्त्रण कार्यालय , उद्योग वाणिज्य संघ, चेम्बर अफ कमर्स, नेपाल पत्रकार रोहबरमा छापा हानी जफत गरिएको घरेलु तथा साना उद्योग कार्यालयका उद्योग अधिकृत सन्तोष खनालले बताए ।
नेपाल सरकारले भूमिकास्थानको सहकारीलाई अनुदानमा दिएको उक्त मल कमिसनको चलखेलमा एग्रोभेटहरुलाई बेचिदिने गरेको पाइएको छ । कृत्रिम अभाव खडा गर्ने गरी उक्त पसलहरूले अनधिकृत रुपमा ,बिक्री गर्ने गरेको पाइएको छ । पछिल्लो समय युरिया मलको अर्घाखाँचीमा अभाव हुँदा खेती पाती गर्ने सिजनमा मकैमा राख्न ठिक परेका किसानहरूले थप सास्ती बेहोर्नु परेको छ ।
अर्घाखाँचीमा युरिया मलको अभाव भएको गुनासो आएपछि जिल्ला प्रशासन कार्यालयका सहायक प्रमुख जिल्ला अधिकारी मेघनाथ पाध्यको नेतृत्वमा गएको अनुगमन टोलीले सन्धिखर्कमा रहेका शान्ति बगैँचा , फुदबाङ, मिडिया चोक, र चुत्राबेँसीमा रहेका एग्रोभेटहरूको अनुगमन गरिएको हो । जफत गरिएको डिएपी तथा कालो मल सन्धिखर्क नगरपालिकामा राखिएको छ ।
